նախընտրելի դարձնելՈւկրաինայի նախկին նախագահ Վիկտոր Յանուկովիչը վստահ է, որ 2014-ի փետրվարին Մայդանում ցուցարարների գնդակահարության հետեւում կանգնած են երկրի ներկայիս իշխանությունների ներկայացուցիչները:
«Ես խորապես համոզված եմ, որ գնդակահարությունների հետեւում կանգնած են Ուկրաինայի ներկայիս բարձրաստիճան պաշտոնյաները, որոնք ջանացել են խնամքով մաքրել հետքերը», - ասել է նախկին նախագահը: Նա հայտնել է, թե «Բերկուտ» հատուկ նշանակության ջոկատի մարտիկներն անմասն են քաղաքացիների մահվանը:
Որպես Մայդանում դեպքերի անմիջական մասնակիցներ, Յանուկովիչը ՌԻԱ Նովոստիին տված հարցազրույցում հիշատակել է Ուկրաինայի Ազգային անվտանգության եւ պաշտպանության խորհրդի քարտուղար Ալեքսանդր Տուրչինովին, Գերագույն Ռադայի առաջին փոխխոսնակ Անդրեյ Պարուբիային եւ ազգային անվտանգության եւ պաշտպանության հարցերով խորհրդարանական կոմիտեի նախագահ Սերգեյ Պաշինսկուն:
«Նրանք բոլորը կապված են Մայդանի արյան հետ, ինչի շնորհիվ իշխանության են եկել: Դրա համար շահագրգռված չեն այդ ողբերգական դեպքերի օբյեկտիվ հետաքննությամբ»,-ասել է Յանուկովիչը: Նա հավելել է, որ անցած երկու տարվա ընթացքում վերոհիշյալ անձինք «ոչ մի անգամ չեն կանչվել հարցաքննության»:
Կիեւի գլխավոր հրապարակը` Անկախության մայդանը, եվրոինտեգրման կողմնակիցների կողմից գրավվել էր 2013-ի նոյեմբերի 21-ին, երբ Նիկոլայ Ազարովի կառավարությունը հայտարարել էր ԵՄ-ի հետ ասոցիացման համաձայնագրի ստորագրումը դադարեցնելու մասին: Բողոքի ճնշման գործում ներգրավվել էր «Բերկուտի» ստորաբաժանումը: 2013-ի նոյեմբերի 30-ից մինչեւ 2014-ի ապրիլի 14-ն ընկած ժամանակահատվածում Կիեւում եւ շրջաններում բախումների հետեւանքով 106 մարդ էր զոհվել: Ուկրաինայի ներկայիս իշխանությունները այդ զոհերի համար պատասխանատու են համարում Յանուկովիչին եւ նրա հատուկ ծառայություններին:
