նախընտրելի դարձնելԴեկտեմբերի 21-ին` ժամը 20:00-ին, Երեւանի Հանրապետության հրապարակում՝ կվառվեն գլխավոր տոնածառի լույսերը: Այս մասին, այսօր՝ դեկտեմբերի 18-ին, լրագրողների հետ հանդիպման ժամանակ նշել է Երեւանի քաղաքապետի տեղակալ Արամ Սուքիասյանը՝ ներկայացնելով մայրաքաղաքում ամանորյա տոնական միջոցառումների ծրագիրը:
Նա տեղեկացրել է, որ տոնական միջոցառումների մեկնարկը կտրվի դեկտեմբերի 21-ին` ժամը 20:00-ին, Հանրապետության հրապարակում՝ գլխավոր տոնածառի լույսերի եւ մայրաքաղաքի արտաքին տոնական լուսավորության միացմամբ:
Երեւանի քաղաքապետարանը Ամանորը Հանրապետության հրապարակում դիմավորել ցանկացող երեւանաբնակներին, ինչպես նաեւ մայրաքաղաքի հյուրերին դեկտեմբերի 31-ին` ժամը 22:00-ից հրավիրում է տոնական համերգային ծրագրի: Ինչպես այս, այնպես էլ մյուս միջոցառումների ժամանակ սպասվում են թեմատիկ նոր երգերի պրեմիերաներ: Այդ օրը մետրոպոլիտենը կաշխատի մինչեւ ժամը 02:00-ը:
Հունվարի 5-ին մայրաքաղաքի գլխավոր տոնածառի շուրջ կանցկացվի «Քեզ՝ փոքրիկ» մանկական զվարճալի ծրագիրը: Իսկ հունվարի 6-ին Սուրբ Ծննդյան տոնին նվիրված համերգային ծրագրի շրջանակում կհնչեն հոգեւոր ու ազգային երաժշտություն եւ երգեր:
«Հատկապես վերջին տարիներին մեր համաքաղաքացիների շրջանում աճել է բացօթյա միջոցառումների նկատմամբ հետաքրքրությունն ու սերը: Սա, իհարկե, շատ հաճելի է, սակայն, միաժամանակ պարտավորեցնում է ամեն անգամ մտածել նոր ու առավել հետաքրքիր լուծումներ»,-նշել է Արամ Սուքիասյանը:
Տոնական բոլոր օրերին` առավոտյան ժամը 12-ից մինչ 20:00-ն, Երեւան ժամանած Ձմեռ պապը Հանրապետության հրապարակի շատրվանների հատվածում պատրաստված դղյակում կընդունի բոլոր փոքրիկներին, ովքեր կարող են հանդիպել Ձմեռ պապին, զրուցել, լուսանկարվել նրա հետ:
Միջոցառումների ծրագրում առկա է նաեւ սոցիալական բաղադրիչ, որի շրջանակում սոցիալապես անապահով ընտանիքներին կցուցաբերվի համապատասխան օժանդակություն:
«Սոցիալական բաղադրիչի շնորհիվ մայրաքաղաքի շուրջ 23 հազար անապահով ընտանիքների վարչական շրջանների աշխատակազմերի միջոցով կտրամադրվի պարենային աջակցություն: Շուրջ 40 հազար երեխաների համար նույնպես նվերներ են նախապատրաստված: Բացի այդ, եւս 4000 երեխաներ էլ հնարավորություն կունենան անվճար այցելել քաղաքապետարանի ենթակայության թատրոններ, դիտել ամանորյա ներկայացումներ»,-ընդգծել է Արամ Սուքիասյանը:
Մայրաքաղաքի արտաքին լուսավորության մասով նշվել է, որ աշխատանքներն այս տարի ընդգրկել են վարչական շրջանների ավելի մեծ թվով հատվածներ: Տարվա հիմնական խորհրդանիշ գույնն է լինելու մուգ կարմիրը, ինչն ընդգծվելու է նաեւ տոնական ձեւավորումներում:
Արամ Սուքիասյանը տեղեկացրել է նաեւ, որ բազմաթիվ բացօթյա եւ դահլիճային տոնական միջոցառումներ կանցկացվեն բոլոր վարչական շրջաններում: Մայրաքաղաքում ամանորյա միջոցառումները կամփոփվեն հունվարի 13-ին՝ երեկոյան ժամը 20:00-ին՝ «Իմ հին ու նոր Նոր տարի» ծրագրով:
