2016թ. մակրոտնտեսագիտական պրոբլեմատիկան կվերաբերի  զարգացող երկրներում արժութային պարտքերին, նավթի գները բարձրացնելու ՕՊԵԿ երկրների ջանքերին, ինչպես նաեւ Շենգեն գոտու անվտանգությանը: Այս մասին գրում է KPMG վերլուծական ընկերության տնօրեն Իաել Սելֆինը:

2015թ. հիմնական ռիսկերը փոխարժույթի տատանումներն էին, նավթի գների անկումը, ֆինանսական շուկայում օճառի նոր պղպջակների առաջացման վտանգը, ինչպես նաեւ Ուկրաինայում եւ Մերձավոր Արեւելքում տիրող իրավիճակը:

Ընդհանուր առմամբ համաշխարհային տնտեսությունը 2015թ. ամփոփում է ավելի դրական արդյունքներով, քան սկսել էր: Հունաստանի գործոնն այլեւս չի սպառնում եվրոգոտու անվտանգությանը: Չինաստանը շարունակում է վերակառուցել տնտեսական կառուցվածքը:

Եվրոգոտու տնտեսությունը հատկապես զգալու է Եվրոպական Կենտրոնական բանկի մեղմ գումարավարկային քաղաքականության կարիքը՝ երկարաժամկետ վարկային եւ կառուցվածքային բարեփոխումների ակնկալիքներով: Եվրոգոտու սահմաններին արդեն աճի նախանշաններ են հայտնվում: Իսկ 2016թ. հատկապես պետք է ուշադրություն դարձնել հետեւյալ երեք հարցերին:

ԱՄՆ Դաշնային պահուստային համակարգի դրույքի բարձրացումը եւ զարգացող երկրների պարտքը

Դեկտեմբերի 16-ին ԱՄՆ Դաշնային պահուստային համակարգը բարձրացրել է տոկոսադրույքը: 2016թ. սպասվում է հետագա բարձրացում, թեպետ եւ աստիճանական:

Արդյունքը կարող է ավելի սուր լինել, քան կանխատեսում էին շատ վերլուծաբաններ: Դա կարող են զգալ այն երկրներն ու ընկերությունները, որոնք էժան փողերի ժամանակաշրջանում կտրուկ պարտքեր են կուտակել տարադրամով:

ՕՊԵԿ երկրները միասին կփորձեն բարձրացնել նավթի գները

Սաուդյան Արաբիան ավելի ակտիվ կերպով կփորձի հասնել իր համար շահավետ գնի: Նավթի եւ գազի թերթաքարային արդյունահանման պայմաններում ՕՊԵԿ-ը ավելի քիչ է ազդում նավթի գների վրա, քան առաջ: Այդուհանդերձ ՕՊԵԿ անդամ երկրներից շատերը կարող են միավորվել ընդհանուր խնդիրների լուծման համար:

Նավթի ներկայիս հարուստ պաշարների պարագայում նավթի գները կարող են միայն  նվազել: Այդ պատճառով դժվար է պատկերացնել, որ նավթի գինը նորից վերադառնա բարելի դիմաց 80 դոլարի: Սակայն ԱՄՆ տնտեսության ակտիվացումը 2016թ. 2-րդ կեսին կարող է հանգեցնել նավթի պահանջարկի աճին:

Եվրոպայի անվտանգությունն ու Շենգեն օրենքների վերանայումը

Համաշխարհային տնտեսությանը լուրջ վնաս կարող է հասցնել Մերձավոր Արեւելքից եւ Հյուսիսայի Աֆրիկայից ներգաղթյալների հոսքը:

Շենգեն համաձայնագրի տապալումը, Եվրոպայում ազատ տեղաշարժի դադարեցումը կարող է լրջորեն կրճատել մարդկանց եւ կապիտալի տեղափոխությունը: Դա կարող է կրճատել առեւտուրն ու ներդրումները: