նախընտրելի դարձնել2015 թվականի 11 ամսվա արդյունքներով Հայաստանի գյուղատնտեսության ոլորտում արձանագրվել է 11,6 տոկոս աճ: Այս մասին, այսօր՝ հունվարի 11-ին, աշխատանքային խորհրդակցության ժամանակ նշել է ՀՀ գյուղատնտեսության նախարար Սերգո Կարապետյանը:
Գյուղնախից NEWS.am-ին հայտնում են, որ խորհրդակցությանը մասնակցում էին նախարարի տեղակալները, նախարարության կառուցվածքային եւ առանձնացված ստորաբաժանումների, ինչպես նաեւ նախարարության ենթակայության մարմինների եւ կազմակերպությունների ղեկավարները:
«Մենք նախորդ տարին ամփոփեցինք բավականին լավ ցուցանիշներով, 11 ամսվա արդյունքներով ունենք 11,6 տոկոս աճ գյուղատնտեսության ոլորտում, եւ այժմ պետք է բոլոր ջանքերը մոբիլիզացնենք աճի տեմպերը պահպանելու, ոլորտում առկա ներքին ներուժը լիարժեք օգտագործելու, թերացումներն ու խնդիրները լուծելու ուղղությամբ»,-իր խոսքում նշել է նախարար Կարապետյանը:
Այս համատեքստում նախարարը հորդորել է մեծ ուշադրություն դարձնել խնայողական ռեժիմների կիրառման, իրականացվող ծրագրերի արդյունավետության բարձրացման, դրանց կատարողականների նկատմամբ մշտադիտարկումների անցկացման հարցերին:
Ոլորտում առկա ներուժն առավել արդյունավետ օգտագործելու եւ տնտեսական աճ ապահովելու առումով նախարարն ընդգծել է նաեւ հանրապետությունում չմշակվող հողերի ծավալների կրճատման, արտադրության ավելացման խնդիրները` առանձնացնելով բանջարաբոստանային մշակաբույսերի, հատկապես լոլիկի եւ կարտոֆիլի ցանքատարածությունների ավելացման կարեւորությունը:
Այս առումով նախարարը հանձնարարել է պատասխանատուներին ամենօրյա աշխատանքեր իրականացնել մարզպետարանների եւ գյուղացիական տնտեսությունների հետ` այս հարցում շեշտադրելով հատկապես խորհրդատվական համակարգի ակտիվ դերակատարումը:
Նախարարը կարեւորել է նաեւ աշխատանքների ինտենսիվացումը բուսաբուծության ոլորտում նորարարական տեխնոլոգիաների, այդ թվում` կաթիլային ոռոգման համակարգերի, հակակարկտային ցանցերի ներդրման, ինտենսիվ պտղատու այգիների հիմնման, ջերմոցային տնտեսությունների ավելացման գործում:
Անդրադառնալով անասնապահության ոլորտում իրականացվելիք ծրագրերին` Սերգո Կարապետյանն առանձնացրել է արհեստական սերմնավորման, տոհմային երինջների ներկրման, սպանդանոցների շահագործման եւ «Համայնքների գյուղատնտեսական ռեսուրսների կառավարման եւ մրցունակության» ( CARMAC 2) ծրագրի ներքո նախատեսված աշխատանքներին առնչվող մի շարք խնդիրներ:
Խորհրդակցության ընթացքում քննարկվել են նաեւ արտահանումների ավելացման, կոոպերացիայի զարգացման, մթերումների դիմաց վճարումների կատարման, վերամշակողների եւ գյուղացիների միջեւ պայմանագրային հարաբերությունների հաստատման եւ այլ հարցեր:
Պատասխանատուներին տրվել են առանձին հանձնարարականներ եւ ցուցումներ` իրենց համակարգման ներքո գտնվող ոլորտների վերաբերյալ:
