նախընտրելի դարձնել
ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը հունիսի 19-ին ընդունեց հայաստանյան բեռնափոխադրող մի շարք ընկերությունների ներկայացուցիչների՝ Հայաստանի միջազգային փոխադրողների ասոցիացիայի նախագահ Հերբերտ Համբարձումյանի գլխավորությամբ։
ՀՀ տրանսպորտի, կապի եւ տեղեկատվական տեխնոլոգիաների նախարարությունից NEWS.am-ին հայտնում են, որ հանդիպման նպատակը բեռնափոխադրումները, մասնավորապես, մրգի արտահանումը արտակարգ ռեժիմով կազմակերպելու ընթացքում առաջացող խնդիրները բարձրաձայնելն ու հնարավոր լուծումներ առաջարկելն էր:
Նախարարին ներկայացվեցին միջազգային բեռնափոխադրումների գործընթացում ի հայտ եկող խոչընդոտները:
Բեռնափոխադրողները նախարարին խնդրեցին վերանայել դեպի երրորդ երկիր թույլտվությունների քանակը, հնարավորության սահմաններում այն ավելացնել, կարգավորել մեքենաներին տրվող սանիտարական անձնագրերի ստացման գործընթացը, դիտարկել վտանգավոր համարվող բեռների փոխադրման համար միջազգային համաձայնագրին միանալու հնարավորությունը:
Վահան Մարտիրոսյանը լսեց բարձրացված խնդիրները, պատասխանեց բեռնափոխադրողներին հուզող հարցերին։ Նա ընդգծեց, որ համաձայնագրին միանալու հարցն արդեն ՀՀ ԱԺ օրակարգում է: Ինչ վերաբերում է բարձրացված մյուս խնդիրներին, ապա նախարարը խոստացավ օրենքի շրջանակներում միջոցներ ձեռնարկել դրանք լուծելու համար:
Հանդիպման ընթացքում անդրադարձ եղավ նաեւ գերծանրաբեռնված մեքենաների խնդրին։ Վահան Մարտիրոսյանը նշեց, որ դա է ճանապարհների ժամանակից շուտ քանդվելու հիմնական պատճառներից մեկը, եւ հորդորեց պահպանել բեռների համար սահմանված քաշը։
