11 ամիս անազատության մեջ գտնվելուց հետո ազատ արձակված «Ոտքի´ Հայաստան» քաղաքացիական շարժման խորհրդի անդամ Դավիթ Հովհաննիսյանի համար Վերաքննիչ դատարանի որոշումն անսպասելի է եղել. «Մեր դատական համակարգն անկանխատեսելի է եւ Վերաքննիչի այս որոշումն անսպասելի էր ինձ համար: Ով ինչ ուզում անում է, այդ պատճառով էլ անկանխատեսելի էր ամեն ինչ»:

Դավիթ Հովհաննիսյանի խոսքով, իրեն առաջադրված մեղադրանքը բացարձակ անհիմն է եղել, որն էլ ի վերջո ապացուցվել է:

«Ես ինձ առաջադրված մեղադրանքը բացարձակապես չեմ ընդունում, նման  բան չի եղել, ես երբեք ոչ մեկի վրա քար չեմ նետել: Իմ դեմ ցուցմունք տված երկու ոստիկանների ցուցմունքը բացարձակ սուտ է: 11 ամիս շարունակ պնդել եմ, որ ոստիկանների նկարածը ուսումնասիրեն եւ կտեսնեն, որ ես բացարձակ անմեղ եմ: Երեւի նայել են բոլոր տեսագրությունները եւ հասկացել, որ ես քար չեմ նետել ոչ մեկի վրա:  Սակայն, 11 ամիս ոչ մի բանի համար ես բերդում նստեցի: Դեռ չգիտեմ, բողոքարկելու ենք թե ոչ, փաստաբանների հետ պետք է խորհրդակցեմ, որովհետեւ ինձ մոտ ինֆորմացիայի պակաս կա, սակայն, ինչ-որ բան որ նախաձեռնեմ՝ լրատվամիջոցները կիմանան»,-ասաց նա:

Դավիթ Հովհաննիսյանը կարծում է, որ 11 ամիս իրեն անազատության մեջ պահելը քաղաքական հետապնդում է եղել իր նկատմամբ. «Այդ դեպքերից հետո հիմնականում ինձ ու Անդրիաս Ղուկասյանին պահեցին անազատության մեջ. հետապնդում էր մեր հանդեպ, մեր քաղաքական հայացքների հետ էր կապված: Ընտրական պրոցեսներ էին, այլ հարցեր կային, դրա համար էլ բերդում պահեցին մեզ»:

Ազատ արձակված «Ոտքի´ Հայաստանի» անդամy շարունակելու է պայքարը, սակայն, դեռ չգիտի՝ ինչ ճանապարհով:

«Մարդ, եթե պայքարող է տեսակով, միշտ էլ շարունակում է պայքարը: Բայց հիմա ես չեմ կարող հստակ ասել, թե ինչպես եմ շարունակելու, քանի որ ինֆորամցիայի պակաս ունեմ, պետք է Հայաստանի քաղաքական դաշտը ուսումնասիրեմ, որ հասկանամ՝ ինչ ձեւով եմ շարունակելու»,-ասաց նա:

Հիշեցնենք, որ Դավիթ Հովհաննիսյանին մեղադրանք է առաջադրվել ՀՀ քրեական օրենսգրքի 225 հոդվածի երկրորդ մասով, այն է՝ զանգվածային անկարգություններին մասնակցելը: Նա 11 ամիս անազատության մեջ էր, հունիսի 21-ին Վերաքննիչ դատարանը որոշում է կայացրել նրան գրավի դիմաց ազատ արձակել: