նախընտրելի դարձնելՄայրաքաղաքի փողոցներն անվանափոխելու առաջարկ ներկայացնելուց առաջ մեկ տարի պետք էր մասնագետների մասնակցությամբ հանրային լսումներ հրավիրել: Այս մասին այսօր՝ սեպտեմբերի 2-ին, լրագրողների հետ հանդիպմանն ասաց երգիչ, երգահան Արտավազդ Բայաթյանը՝ անդրադառնալով «Ելքի» առաջարկին:
«Միայն պատմագետներն ու բանասերները կարող են խոսել այդ գործիչների մասին: Կուսակցական ռասիզմ է կարծես, գոնե մի տարի պետք էր նախապատրաստել հասարակության կարծիքը: Հապշտապ, չմտածված բան է, հերթական շուխուր անելու փորձն է: Ավելի լավ է քաղաքի մաքրության մասին մտածեն»,- ասաց Արտավազդ Բայաթյանը:
Ռեժիսոր Նիկոլայ Ծատուրյանն ավագանու խմբակցության առաջարկին հեգնանքով արձագանքեց. «Վերջապես մի թերություն տեսա մեր հայրենիքում, բոլոր հարցերը մենք լուծել էինք, մնացել էր փողոցներն անվանափոխելու հարցը: Ինձ համար ամենամեծ խնդիրն այն է, որ հսկայական արտագաղթ է, Հայաստանը վերանում է: Ինձ համար իսկական խնդիր է, որ երիտասարդերը չեն ուզում բանակ գնալ: Սրանք են գլոբալ խնդիրները: Նույնն է, որ ես հսկայական վերանորոգում եմ սկսում տանս ու մտածում եմ, թե պլենդուզն ինչ գույն ներկեմ: Հիմա այս խնդիրը պլենդուզն է»:
Երգիչ, երգահան Վահան Արծրունու կարծիքով, նախ եւ առաջ պետք էր քաղաքական գնահատական տալ բոլշեւիկյան ժամանակաշրջանին, գաղտնազերծվեին բոլոր փաստաթղթերը, հանրային քննարկումներ հրավիրվեին, որից հետո միայն նման առաջարկներ ներկայացվեին:
«Մյուս կողմից, մեխանիզմն է անհասկանալի: Խմբակցությունն առաջարկն անում է ավագանուն, որի անդամներն էլ որոշում են կայացնում: Հենց մի խումբ մարդկանց առաջարկով էր, որ այսօր Էջմիածնում ունենք Արամ Ասատրյանի անվան փողոց: Նույն հաջողությամբ մի օր կարող ենք հայտնվել Լեւոն Տեր Պետրոսյանի կամ Սերժ Սարգսյանի անվան փողոցում»,- ասաց Վահան Արծրունին:
Հիշեցնենք, որ Երեւանի ավագանու «Ելք» խմբակցությունն առաջարկում է անվանափոխել մայրաքաղաքի այն փողոցները, որոնք կրում են խորհրդային ժամանակաշրջանի հակասական քաղաքական գործիչների անուններ:
