նախընտրելի դարձնել
Ամերիկացի միլիարդատեր, National Instruments ընկերության համահիմնադիր Ջեյմս Թրուշարդը շատ է լսել Օսմանյան կայսրությունում Հայոց Ցեղասպանության մասին, սակայն միայն այժմ՝ Ցեղասպանության զոհերի հիշատակին նվիրված հուշահամալիր այցելելուց հետո, գիտակցում է կատարվածի ողջ սարսափը: Այս մասին նա ասաց լրագրողների հետ զրույցում:
Նա նշեց, որ աշխատել է հայերի հետ եւ ժամանակ առ ժամանակ նրանցից լսել Ցեղասպանության մասին: Ավելին՝ նա ճանաչել է մի մարդու, որի պապիկը Ցեղասպանության ժամանակ ստիպված է եղել ԱՄՆ փախչել:
«Ես լսել էի Ցեղասպանության մասին, բայց այժմ սեփական աչքերով տեսա այն բոլոր ապացույցները, այն ողջ սարսափը, որը կատարվել է, բայց չպետք է կատարվեր: Պետք է այնպես անել, որ ապագայում երբեք նման բան տեղի չունենա», - նշեց Թրուշարդը:
«Արձագանքների գրքում ես գրեցի, որ պետք է պայքարել մարդու նկատմամբ մարդու անմարդկային վերաբերմունքի դեմ»:
Ջեյմս Ջոզեֆ Թրուշարդը ամերիկացի միլիարդատեր է, ինժեներ էլեկտրիկ եւ գործարար, National Instruments ընկերության համահիմնադիրներից մեկը, որը ավտոմատ թեստային սարքավորումներ եւ ծրագրային ապահովում է արտադրում վիրտուալ գործիքակազմի համար եւ որը նաեւ գրասենյակ ունի Հայաստանում:
Այս տարի Թրուշարդը Հայաստանում ՏՏ ոլորտում համաշխարհային ներդրման համար դարձել է պետական մրցանակի դափնեկիր:
