նախընտրելի դարձնել
Ավարտվել է հունիսի 25-ին ոսկերչական խանութից թանկարժեք մատանի հափշտակելու դեպքի առթիվ հարուցված քրեական գործի նախաքննությունը։
Քննչական կոմիտեից հայտնում են, որ հունիսի 25-ին ոստիկանությունում ահազանգ է ստացվել, որ Մոսկովյան փողոցում գործող ոսկերչական խանութի տագնապի ազդանշանը միացել է: Անմիջապես դեպքի վայր մեկնած քննչական-օպերատիվ խումբը պարզել է, որ խանութից հափշտակվել է թանկարժեք զարդ։
Դեպքի առթիվ հարուցվել է քրեական գործ՝ Քրեական օրենսգրքի 175-րդ հոդվածի 2-րդ մասի 2-րդ եւ 4-րդ կետերով, ձեռնարկված միջոցառումների արդյունքում պարզվել է ենթադրյալ հանցագործություն կատարած անձի ինքնությունը, ով Շիրակի մարզի բնակիչ է՝ ծնված 1986թ.։
Իրականացված բազմակողմանի, լրիվ եւ օբյեկտիվ քննությամբ պարզվել են քրեական գործի համար էական նշանակություն ունեցող մի շարք հանգամանքներ: Մասնավորապես, հիմնավորվել է, որ հունիսի 25-ին՝ ժամը 13:40-ի սահմաններում, Երեւանի Մոսկովյան փողոցում գործող ոսկերչական խանութ է մտել մի երիտասարդ եւ գնելու նպատակով վաճառողուհուց վերցրել կանացի թանկարժեք մատանի՝ ոսկուց եւ ադամանդե քարերով։ Այն խանութի մուտքի մոտ գտնվող իր ծանոթին ցույց տալու պատրվակով երիտասարդը դուրս է եկել խանութ-սրահից, վազելով նստել է մոտակայքում կայանված անձնական օգտագործման «Մերսեդես E-320» մոդելի ավտոմեքենան, սակայն, մեքենան վարելու ընթացքում հարվածել է մոտակայքում կայանված մի շարք ավտոմեքենաների:
Քննությամբ ձեռք բերված տվյալների համաձայն՝ խանութի պահպանությունն իրականացնող աշխատակիցը մոտեցել է ենթադրյալ հանցագործություն կատարած անձին, ում ուղղությամբ վերջինս պահել է իր մոտ գտնվող դանակը եւ անմիջապես դիմել փախուստի:
Հաջորդ օրը՝ հունիսի 26-ին 32-ամյա տղամարդը ներկայացել է ոստիկանության բաժին, որտեղ ժամը 10:50-ի սահմաններում բաժնի սենյակներից մեկում սպառնացել է եւ բռնություն գործադրել նույն բաժնի ավագ օպերլիազորի նկատմամբ, ինչի առթիվ հարուցվել է նոր քրեական գործ, միացվել նշված քրեական գործին, եւ նախաքննությունը շարունակվել նույն վարույթում:
Քրեական գործվ իրականացված մեծածավալ քննչական եւ դատավարական այլ գործողությունների արդյունքում տվյալներ ձեռք չեն բերվել 32-ամյա տղամարդու կողմից ավազակային հարձակում կատարելու վերաբերյալ, արարքը վերաորակվել է, եւ ձեռք բերված բավարար ապացույցների հիման վրա՝ վերջինիս մեղադրանք է առաջադրվել՝ ՀՀ քրեական օրենսգրքի 176-րդ հոդվածի 2-րդ մասի 2-րդ կետով եւ 137-րդ հոդվածի 1-ին մասով:
Քննությամբ տվյալներ են ձեռք բերվել, որ 1986թ. ծնված տղամարդը հոգեկան առողջության հետ կապված որոշ խնդիրներ ունի եւ հաշվառված է հոգեկան առողջության կենտրոնում։ Վերջինիս մեղսունակության հարցը պարզելու նպատակով նշանակվել է դատահոգեբուժական ստացիոնար փորձաքննություն, որի եզրակացության համաձայն՝ նա ճանաչվել է անմեղսունակ: Ըստ դատաբժիշկների՝ տղամարդը նշված արարքը կատարել է ցնորազառանցական ապրումների ազդեցության ներքո, ինչը զրկել է նրան գիտակցել իր գործողությունների վտանգավորությունը եւ ղեկավարել դրանք:
Ուստի՝ որոշում է կայացվել նրա վերաբերյալ բժշկական բնույթի հարկադրանքի միջոց կիրառելու եւ առանձին վարույթ ընդունելու վերաբերյալ:
Հայտարարվել է քրեական գործի նախաքննության ավարտի մասին, եւ քրեական գործը՝ 32-ամյա տղամարդու նկատմամբ բժշկական բնույթի հարկադրանքի միջոց կիրառելու մասին միջնորդությամբ, ուղարկվել է քրեական գործի օրինականության նկատմամբ հսկողություն իրականացնող դատախազին:
