Չինաստանը երբեք չի ձգտել մարտահրավեր նետել կամ զբաղեցնել Միացյալ Նահանգների տեղը աշխարհում եւ մտադիր չէ կիսել ազդեցության ոլորտը Միացյալ Նահանգների հետ: Այս մասին հայտարարել է Չինաստանի Կոմունիստական ​​կուսակցության Կենտկոմի քաղբյուրոյի անդամ, ՉԿԿ ԿԿ-ի արտաքին հարաբերությունների հանձնաժողովի գրասենյակի ղեկավար Յան Ցզեչին, փոխանցում է ՏԱՍՍ-ը:

«Չինաստանը երբեք չի խառնվել Միացյալ Նահանգների ներքին գործերին, այդ թվում` ԱՄՆ ընտրություններին, երբեք իր զարգացման մոդելը չի ​​խթանել արտաքին աշխարհում, երբեք չի մասնակցել գաղափարական առճակատմանը, չի փորձել մարտահրավեր նետել կամ գրավել Միացյալ Նահանգների դիրքը, երբեք մտադրված չեն եղել բաժանել ազդեցության ոլորտը»,- ասել է նա ԱՄՆ-Չինաստան հարաբերությունների ազգային կոմիտեի ներկայացուցիչների հետ առցանց հանդիպման ժամանակ:

Յան Ցզեչին նշել է, որ «Չինաստանը եւ Միացյալ Նահանգները երկու մեծ տերություններ են` տարբեր պատմություններով, մշակույթներով, համակարգերով եւ տարաձայնություններով որոշ հարցերի շուրջ»: Նրա խոսքով` «երկու կողմերն էլ պետք է հարգեն միմյանց պատմական եւ մշակութային ավանդույթները, հարգեն միմյանց առանցքային հետաքրքրություններն ու խնդիրները, հարգեն միմյանց կողմից ընտրված քաղաքական համակարգը եւ զարգացման ուղին»:

Նա նաեւ նշել է, որ Միացյալ Նահանգները պետք է դադարեցնեն միջամտությունները Չինաստանի, մասնավորապես` Հոնկոնգի, Տիբեթի եւ Սինցզյան-Ույգուրյան ինքնավար շրջանի (ՍՈւԻՇ) տարածքային ամբողջականությանը եւ ինքնիշխանությանը վերաբերող հարցերին: Յան Սզեչիի խոսքով` այս հարցերն անձեռնմխելի են, միջամտությունը դրանց կարող է լրջորեն վնասել չին-ամերիկյան հարաբերություններին եւ ԱՄՆ շահերին: