Ճապոնիայի արտգործնախարար Տոշիմիցու Մոտեգիի եւ նրա ամերիկացի գործընկեր Էնթոնի Բլինքենի բանակցությունները սկսվել են երեքշաբթի օրը Տոկիոյում: Սա ԱՄՆ նոր պետքարտուղարի առաջին այցն է Ճապոնիա: Հանդիպումից առաջ ճապոնացի նախարարը հայտարարել է Վաշինգտոնի հետ դաշինքն ամրապնդելու Տոկիոյի ցանկության մասին, փոխանցում է ՏԱՍՍ-ը:

«Մենք բարձր ենք գնահատում [ԱՄՆ նախագահ Ջո Բայդենի] անսասան վճռականությունը՝ զարգացնելու ճապո-ամերիկյան դաշինքը, որը կայունության եւ անվտանգության հիմնաքարն է հնդ-խաղաղօվկիանոսյան տարածաշրջանում»,- ասել է Ճապոնիայի արտաքին գործերի նախարարը բանակցություններից առաջ: Նա նաեւ շեշտել է, որ առաջիկա բանակցությունների ընթացքում «նա ակնկալում է էլ ավելի ամրապնդել երկկողմ դաշինքը, որն իսկապես անխորտակելի է»:

Ճապոնիայի արտգործնախարարը հիշեցրել է նաեւ, որ ապրիլի սկզբին վարչապետ Յոսիհիդե Սուգան կայցելի Միացյալ Նահանգներ՝  դառնալով առաջին օտարերկրյա ղեկավարը, որն անձամբ է հանդիպել ԱՄՆ նոր նախագահ Ջո Բայդենի հետ:

Բլինքենը, իր հերթին,  նշել է, որ իր համար սա առաջին արտասահմանյան ուղեւորությունն է նոր պաշտոնում: «Եվ պատահական չէ, որ մենք եկանք Ճապոնիա: Ինչպես ասել է նախարար Մոտեգին, ամերիկա-ճապոնական դաշինքը կայունության, կայունության երաշխավոր է ոչ միայն տարածաշրջանում, այլ ամբողջ աշխարհում », - շեշտեց նա: ԱՄՆ պետքարտուղարը նշել է, որ ակնկալում է անդրադառնալ երկկողմ համագործակցության առանցքային հարցերին եւ քննարկել իրավիճակը տարածաշրջանում: «Ես շատ ուրախ եմ, որ վերջապես հանդիպեցինք դեմ առ դեմ, դիմակ առ դիմակ, ես կասեի»,- կատակեց Բլինքենը: