նախընտրելի դարձնելՊարբերականը գրում է, որ օրերս գյուղնախարար Սերգո Կարապետյանն այցելել է Լոռու մարզի Եղեգնուտ համայնք: Թերթի փոխանցմամբ` Սերգո Կարապետյանն այնպես է իրեն պահել գյուղացիների հետ շփման ընթացքում, որ նրան գրեթե «դուրս են հրավիրել» գյուղից:
Մասնավորապես, բնակիչների դժգոհություններին, թե նախարարությունն իրենց ոչնչով չի օգնում, նույնիսկ համապատասխան տեխնիկա չի հատկացնում, Սերգո Կարապետյանը բավական կոպիտ է պատասխանել, ինչն ավելի է զայրացրել գյուղացիներին:
Գյուղացիների դժգոհությունը մեղմելու փոխարեն` Կարապետյանը նկատողություն է արել նրանց` ասելով. «Կարտ ու նարդի եք խաղում, ինչո՞ւ չեք գնում հանդ»: Նրա այս խոսքերն էլ ավելի են զայրացրել գյուղացիներին, որոնցից մեկը, ի պատասխան Կարապետյանի, ասել է. «Տո ջահել, մեր գյուղում ձենդ չբարձրացնես»: Զգալով, որ գյուղացիների մոտ «վերակացուի» իր պահվածքը հակառակ արդյունքի է հանգեցնում, Կարապետյանը սկսել է արդարանալ` ասելով. «Ես էլ եմ մարդ, ես էլ եմ բորբոքվում»: «Չնայած, Կարապետյանին կարելի է հասկանալ` մարդը գյուղատնտեսության նախարար դառնալով` հույս ուներ, որ դաշտերն օրհնելով ամեն ինչ կլինի, իրեն էլ գյուղացիները «մինիստրի տեղ կդնեն», սակայն կյանքը ցույց տվեց, որ իր պաշտոնավարման յուրաքանչյուր օրը ավելի ծանր է դարձնում գյուղատնտեսության եւ գյուղացու վիճակը»,-նկատում է թերթը :
