Կառավարությունն իր այսօրվա՝ ապրիլի 7-ի նիստում որոշեց գերակա ոլորտում իրականացվող ներդրումային ծրագրի շրջանակներում մաքսատուրքից ազատել «ԳԵՎՄԻԿ» սահմանափակ պատասխանատվությամբ ընկերության կողմից ներմուծվող աշրանքները:

Որոշման հիմնավորման մեջ նշվում է, որ «ԳԵՎՄԻԿ» ընկերությունը Արագածոտնի մարզում նախատեսում է կառուցել 2 հա ընդհանուր մակերեսով գերժամանակակից ջերմոցային համալիր,  որը համալրված է լինելու առաջատար տեխնոլոգիաներով և սարքավորումներով։

Ընկերությունը հավակնում է զբաղեցնել առաջատար դիրքեր ռուսաստանյան ծաղկի շուկայում։ Ջերմոցային համալիրում նախատեսվում է աճեցնել տարբեր տեսակի, բարձր բերքատվություն ապահովող վարդեր և դրա հիմնական մասը՝ 90 տոկոսը, վաճառվելու է ռուսաստանյան մեծածախ մատակարարներին, իսկ մնացած 10 տոկոսը՝ անմիջապես ՀՀ խոշորագույն առևտրային մանրածախ ցանցերին։

Նախապատրաստական աշխատանքները սկսվել են 2022թ․-ի հունվար ամսից: Ընկերությունը հիմնադրվել է 1999 թվականին։

Արդեն իսկ իրականացվել է 60 մլն դրամի կապիտալ ներդրում։ Ծրագրի շրջանակում նախատեսվում է իրականացնել 1․4 մլրդ դրամի ներդրում՝ ցանկում ներկայացված ապրանքների ձեռքբերման համար և 540 մլն դրամի կապիտալ ներդրում։ Նախատեսվում է ներդրումային ծրագրի շրջանակում ստեղծել 50 նոր աշխատատեղ` մինչև 150,000 դրամ միջին աշխատավարձով։

Արտոնություն ստանալու համար ներկայացված ապրանքների արժեքը կազմում է 1․4  մլրդ դրամ: Մաքսատուրքից ազատման արտոնությունը գնահատվում է 70 մլն դրամ: