Ավստրալացի կարդինալը, որը Հռոմի պապ Ֆրանցիսկոս Առաջինի պապությունը «աղետ» էր անվանել, թաղվել է շաբաթ օրը, Սուրբ Պետրոսի տաճարում, ընդ որում՝ պոնտիֆիկոսն իր վերջին օրհնությունն է տվել Վատիկանի երբեմնի բարձրաստիճան պաշտոնյային, հայտնում է АР-ն:

81-ամյա կարդինալ Ջորջ Փելը մահացել է հունվարի 10-ին՝ Հռոմի հիվանդանոցում, ազդրի վիրահատությունից անմիջապես հետո: Երեք տարի լինելով Վատիկանի ֆինանսների նախարար՝ Փելն առանցքային դեմք է եղել Ֆրանցիսկոսի պապության առաջին տարիներին, որի նպատակներից էր Սուրբ Աթոռի ֆինանսների բարեփոխումը, որը սկանդալների եւ վատ կառավարման երկար պատմություն ուներ:

Ավելի ուշ Փելը վերադարձել է իր հայրենի Ավստրալիա, որպեսզի դատարանի առաջ կանգնի երեխաների նկատմամբ սեռական բռնության մեղադրանքով` կապված Մելբուռնի արքեպիսկոպոսության ժամանակ երգչախմբի երկու տղաների նկատմամբ ոտնձգությունների մեղադրանքների հետ: Նա մեկ տարի անցկացրել է մեկուսարանում՝ մինչեւ 2020 թվականին դատարանի նախկին դատավճռի չեղարկումը։

Ինչպես ընդունված է կարդինալների հուղարկավորության ժամանակ, գթասրտության մասին աղոթքի եւ հավերժական հանգստի համար լատիներենով ընթերցված փակման օրհնությունը Ֆրանցիսկոս պապն է կարդացել:

Հուղարկավորության պատարագը կատարել է իտալացի կարդինալ Ջովաննի Բատիստա Ռեն՝ որպես Կարդինալների կոլեգիայի դեկան։

Փելի մահից անմիջապես հետո հայտնի է դարձել, որ կարդինալը եղել է այն հուշագրի հեղինակը, որը շրջանառվում էր երկար ամիսներ։ Այս գրության մեջ Փելն ափսոսում էր, որ ներկայիս պապականությունը «դժբախտություն ու աղետ է»։

Առանձին Փելի մահվան հաջորդ օրը, պահպանողական ամսագիրը հրապարակել է կարդինալի հոդվածը, որտեղ նա կանանց սեքսուալության եւ դերի մասին եկեղեցու ուսմունքի եւ նման հարցերի մասին կաթոլիկների կարծիքը ստանալու Ֆրանցիսկոսի ձգտումը «թունավոր մղձավանջ» է անվանել։ Սպասվում է, որ այս հարցերը բուռն քննարկման առարկա կդառնան այս տարվա վերջին՝ Վատիկանում Ֆրանցիսկոսի կողմից հրավիրված եպիսկոպոսների ժողովի ժամանակ:

Փելի մահվան հաջորդ օրը Ֆրանցիսկոսը ցավակցական հեռագրում հարգանքի տուրք է մատուցել կարդինալին՝ ասելով, որ երբ նա ղեկավարում էր տնտեսական բաժինը, «վճռականորեն եւ իմաստուն կերպով հիմք է դրել» Սուրբ Աթոռի ֆինանսական համակարգի բարեփոխումների համար, որոնք երկար տարիներ քննադատվել են միջազգային ֆինանսական վերահսկողության մարմինների կողմից։