նախընտրելի դարձնել
Եթե միջազգային կոնֆերանս լինի, որտեղ քննարկվեն սմբակավոր կենդանիների իրավունքները ու դիցուք, այդ քննարկմանը մասնակցի՝ ամենայն հարգանքով, պարոն Ալեքսանյանը (Վահագն Ալեքսանյան-խմբ), հարց կառաջանա՝ ինչ կապ ունի անվտանգության հարցերով հանձնաժողովի անդամը սմբակավոր կենդանիների իրավունքների հետ։ Այս մասին այսօր՝ մայիսի 2-ին, ԱԺ ամբիոնից հայտարարեց «Հայաստան» խմբակցության պատգամավոր Արթուր Խաչատրյանը։
«Հիմա մարդը, որը մասնագիտանում է հայ-թուրքական բանակցություններում, մասնակցում է հայ-ադրբեջանական հարաբերությունների վերաբերյալ բանակցություններին։ Տրամաբանական հարց է առաջանում՝ ինչու։
Դա արդյո՞ք չի նշանակում, որ ադրբեջանահայկական հարաբերությունները և թուրք-հայկական հարաբերությունները միաշաղկապվել են՝ ելնելով Թուրքիայի պահանջներից։ Դա հստակ է չէ՞։ Հիմա, վեր կենալ ու ասել՝ Ռուբինյանը ԱԺ փոխնախագահ է դրա համար է գնացել, որովհետև մենք խորհրդարանական պետություն ենք: Պարոն Արշակյան, դուք գնայիք, դուք էլ եք ԱԺ փոխնախագահ»,- ասաց Խաչատրյանը:
ԱԺ փոխխոսնակ Հակոբ Արշակյանն էլ արձագանքեց. «ԱԺ-ն այս պահին երկու փոխնախագահ ունի, ԱԺ նախագահն է որոշում՝ ով գնա: Այո, կարող էի եւ ես գնալ, ինչ խնդիր կա»:
Ավելի վաղ NEWS.am-ը հայտնել էր, որ այսօր ԱԺ նիստում «Հայաստան» խմբակցության անդամ Գեղամ Մանուկյանը հայտարարել էր, որ հայ ժողովրդի թիկունքում, ստվերային, գաղտագողի տեղի են ունենում գործընթացներ, տարբեր ձևաչափով հանդիպումներ, որոնք վտանգում են ՀՀ և Արցախի Հանրապետության անվտանգությունը, հարվածի տակ են դնում մեր ժողովրդին, պետականությունը և ազգային անվտանգությունը։ Նա նաեւ հարց էր բարձրացրել, թե ինչու է այդ բանակցություններին մասնակցում Թուրքիայի հետ բանակցող Ռուբեն Ռուբինյանը:
Սրան ի պատասխան ՔՊ-ական պատգամավոր Վահագն Ալեքսանյանը նշել էր, որ Ռուբեն Ռուբինյանը շաբաթվա մեջ հանդիպում է տասնյակ կամ 5-6 երկրների պատվիրակությունների Հայաստանում եւ Հայաստանից դուրս. «Օրինակ, հեչ եղե՞լ է, որ գաք այստեղ, ասեք՝ այ, որ Ռուբեն Ռուբինյանը հանդիպեց Բուլղարիայի պատվիրակությանը, արդյոք դա նշանակում է, որ Հայաստանը փորձում է հայ-բուլղարական հարաբերությունները կապել հայ-թուրքականին»:
