Երեկվանից Պրիվոլժիեի դաշնային շրջանի ութ սուբյեկտների տարածքի վրա ներգործում են   վտանգավոր օդերևութաբանական երևույթներ, որոնք ուղեկցվում են մինչև 27 մ/վրկ քամու պոռթկումներով։ ՌԴ Արտակարգ իրավիճակների նախարարության տվյալներով՝ տուժել է 76 մարդ, որոնցից 9-ը  մահացել է։

Գերատեսչության տվյալներով՝ էլեկտրամատակարարման խափանումներ են տեղի ունեցել ավելի քան 99,5 հազար բնակչությամբ 520 բնակավայրերում, տապալվել է ավելի քան 550 ծառ, վնասվել են 41 բնակելի շենքի տանիքներ և սոցիալապես նշանակալի յոթ օբյեկտ։

Ներկա պահին ԱԻՆ աշխատակիցները շարունակում են Վոլգայում  շրջված նավակի ուղեւորների որոնումները։ «Այս պահի դրությամբ յոթ մարդու հաջողվել է փրկել, մեկը զոհվել է, երկուսի ճակատագիրը դեռևս անհայտ է»,- հայտնել են նախարարությունից։

«Ինտերֆաքս»-ի փոխանցմամբ՝ վատ եղանակի հետեւանքների վերացմանը մասնակցել է 758 մարդ, ներգրավվել է 180 միավոր տեխնիկա։