Իսրայելական ուժերը հասել են Գազայի գլխավոր հիվանդանոցի դարպասներին, որն առանցքային թիրախ է Գազայի հատվածի հյուսիսային կեսի վերահսկողության համար պայքարում, որտեղ բժիշկները ասում են, որ հիվանդները, այդ թվում՝ նորածինները, մահանում են վառելիքի բացակայության պատճառով:

Գազայի Առողջապահության նախարարության խոսնակ Աշրաֆ Ալ-Կիդրան, ով գտնվում էր Ալ-Շիֆա հիվանդանոցում, ասել է, որ հիվանդանոցի պաշարման և էլեկտրաէներգիայի անջատման հետևանքով վերջին երեք օրվա ընթացքում մահացել է 32 հիվանդ, այդ թվում՝ երեք նորածին։

Առնվազն 650 հիվանդ դեռ ներսում է, որոնց հուսահատ փորձում են տարհանել մեկ այլ բժշկական հաստատություն։ Իսրայելը պնդում է, որ հիվանդանոցը գտնվում է թունելների վերևում, որտեղ գտնվում է ՀԱՄԱՍ-ի զինյալների շտաբը, սակայն Համասը հերքում է:

«Հիվանդանոցի դիմաց տանկեր են կանգնած։ Մենք լիակատար պաշարման մեջ ենք: Սա ամբողջովին քաղաքացիական տարածք է։ Հիվանդանոցում միայն հիվանդներն են,  բժիշկները և այլ քաղաքացիական անձինք։ Ինչ-որ մեկը պետք է դադարեցնի սա», - Reuters-ին հեռախոսով ասել է դոկտոր Ահմեդ Էլ Մոխալալաթին: «Նրանք ռմբակոծել են (ջրի) տանկերները, ջրհորները, թթվածնի պոմպը։ Նրանք հիվանդանոցում ամեն ինչ ռմբակոծել են։ Այսպիսով, մենք հազիվ ենք գոյատևում: Բոլորին ասում ենք, որ հիվանդանոցն այլևս անվտանգ վայր չէ բուժման համար։ Մենք հիվանդներին վնասում ենք՝ նրանց այստեղ պահելով»:

Անցյալ ամիս Իսրայելը Համասը ոչնչացնելու արշավ սկսեց։ Այդ ժամանակից ի վեր իսրայելական անողոք ռազմական արշավի արդյունքում հազարավոր Գազայի բնակիչներ են սպանվել, իսկ բնակչության կեսից ավելին մնացել է անօթևան: Իսրայելը հրամայել է ամբողջությամբ տարհանել Գազայի հատվածի հյուսիսային կեսը։ Գազայի բժշկական իշխանությունները հայտնում են, որ մահացել է ավելի քան 11,000 մարդ, որոնցից մոտ 40%-ը երեխաներ են:

Այն պահից, երբ հոկտեմբերի վերջին Իսրայելի ցամաքային զորքերը մտան Գազա և արագորեն շրջապատեցին Գազա քաղաքը, մարտերը կենտրոնացած են ալ-Շիֆայի շուրջ, որը անկլավի ամենամեծ հիվանդանոցն է:

Գազայի առողջապահության նախարարության խոսնակ Կիդրան ասել է, որ այժմ հիվանդանոցի դարպասների մոտ իսրայելական տանկ կա: Իսրայելական դիպուկահարներն ու անօդաչու սարքերը գնդակոծել են հիվանդանոցը՝ անհնարին դարձնելով բժիշկների և հիվանդների տեղաշարժը: «Մենք պաշարված ենք և գտնվում ենք մահվան շրջանակում», - ասել է նա։

Իսրայելը կարգադրել է խաղաղ բնակիչներին լքել երկիրը, իսկ բժիշկներին՝ հիվանդներին ուղարկել այլ վայրեր: Իսրայելը պնդում է, որ հիվանդանոցի մուտքի մոտ թողել է 300 լիտր վառելիք՝ շտապ օգնության գեներատորները սնուցելու համար, սակայն ՀԱՄԱՍ-ը արգելափակել է այդ առաջարկները։

Կիդրան ասել է, որ 300 լիտր վառելիքը կբավականացնի կես ժամ, իսկ հիվանդանոցին անհրաժեշտ է օրական 8000-10000 լիտր վառելիք: Իսրայելցի պաշտոնյան, ով խնդրել է անանուն մնալ, ասել է, որ 300 լիտրը կարող է մի քանի ժամ տեւել, քանի որ բաց է միայն շտապ օգնության բաժանմունքը:

Բժիշկ Էլ Մոխալլատին ասում է, որ վաղաժամ ծնված երեխաները, որոնք սովորաբար պահվում են առանձին ինկուբատորներում, յուրաքանչյուր մահճակալի համար ութ երեխա են տեղավորել, որպեսզի մեկը մյուսին ջերմացնի: Երեքի մահից հետո, նրա խոսքով, նորածնային բաժանմունքում մնացել է 36 երեխա։ «Մենք ակնկալում ենք, որ ամեն օր ավելի շատ երեխա կկորցնենք»:

Գազայի հյուսիսում գտնվող երկրորդ խոշոր հիվանդանոցը՝ Ալ-Քուդսը, նույնպես դադարեցրել է աշխատանքը: Պաղեստինյան Կարմիր մահիկը հայտնել է, որ հիվանդանոցի շուրջը հրետանային ռմբակոծություն է եղել, և Կարմիր խաչի մեքենաների շարասյունը ուղարկվել է հիվանդներին տարհանելու, իսկ անձնակազմը չի կարողացել հասնել այնտեղ:

Ավելի քան մեկ ամիս տևած հակամարտությունը բևեռացրել է աշխարհը, քանի որ շատ երկրներ ասում են, որ նույնիսկ ՀԱՄԱՍ-ի հարձակումների ցնցող դաժանությունը չի արդարացնում Իսրայելի պատասխանը, որը շրջափակման մեջ գտնվող խիտ բնակեցված տարածքում այդքան շատ խաղաղ բնակիչների է սպանել:

Ենթադրվում է, որ հարյուր հազարավոր խաղաղ բնակիչներ մնում են Գազայի հյուսիսում, չնայած Իսրայելի հրամաններին՝ լքել այդ հատվածը: Իսրայելը նաև պարբերաբար ռմբակոծում էր հարավը։ Առողջապահության պաշտոնյաները հայտնել են, որ առնվազն 14 մարդ է զոհվել Գազայի հարավային Խան Յունիս քաղաքում երկու առանձին հարվածների հետևանքով: Նասերի հիվանդանոցում վիրավորներին, այդ թվում երեխաներին, մարդիկ բերել են անձնական մեքենաներով։