նախընտրելի դարձնել
Իսրայելի վարչապետ Բենիամին Նեթանյահուն հայտնել է, որ Իսրայելը նպատակ ունի լիովին ոչնչացնել ՀԱՄԱՍ խմբավորումը, որովհետեւ հակառակ դեպքում այն վտանգ կներկայացնի ոչ միայն Մերձավոր Արեւելքի, այլեւ արեւմտյան երկրների համար։
«Մենք պետք է հաղթենք ոչ միայն հանուն մեզ, այլեւ հանուն Մերձավոր Արեւելքի, մեր արաբ հարեւանների... Եթե մենք հիմա չհաղթենք, ապա Եվրոպան եւ դուք (ԱՄՆ-ն) հաջորդն եք լինելու»,- ասել է Նեթանյահուն Fox News ամերիկյան հեռուստաալիքի հարցազրույցում։
«Յուրաքանչյուր ամերիկացի, յուրաքանչյուր քաղաքակիրթ երկիր սպառնալիքի տակ կլինի։ Մենք պետք է հաղթենք։ Եվ ոչնչով չի կարելի փոխարինել հաղթանակը։ Միայն լիակատար հաղթանակ»,- նշել է Իսրայելի վարչապետը։
Նա նորից դեմ է արտահայտվել հրադադարին, եթե ազատ չարձակվեն իսրայելցի բոլոր պատանդները։ Նրա խոսքով՝ դա կնշանակեր, որ Իսրայելը «հանձնվել է ՀԱՄԱՍ-ին»։
Նեթանյահուն մեկնաբանել է նաեւ բողոքներն ի աջակցություն պաղեստինցիների տարբեր երկրներում՝ նշելով, որ «մենք չենք տրվի ճնշմանը»։ «Մենք անում ենք այն, ինչը ճիշտ է, եւ հաղթանակ կտանենք այս պատերազմում հանուն մեզ եւ հանուն մարդկության ու քաղաքակրթության»,- ասել է նա։
