նախընտրելի դարձնել
Թուրքիայի խորհրդարանի միջազգային հարցերի հանձնաժողովը նոյեմբերի 16-ին կքննարկի ՆԱՏՕ-ին Շվեդիայի անդամակցության արձանագրությունը։ Այս մասին ՏԱՍՍ-ին տեղեկացրել է աղբյուրը երկրի խորհրդարանում։
«Փաստաթղթի քննարկումը հանձնաժողովում կսկսվի այս հինգշաբթի։ Դրա հաստատումից հետո այն կներկայացվի խորհրդարանի քվեարկությանը»,- ասել է գործակալության զրուցակիցը՝ չնշելով, թե որքան կտեւի փաստաթղթի դիտարկումը։
Թուրքիայի նախագահ Ռեջեփ Թայիփ Էրդողանը ՆԱՏՕ-ին Շվեդիայի անդամակցության արձանագրությունը ստորագրել եւ այն խորհրդարան է մտցրել հոկտեմբերի 23-ին։ Թուրքական իշխանություններն ավելի վաղ հայտարարում էին, որ հնարավոր է Շվեդիայի հայտի քննարկումը հոկտեմբերին։
Արձանագրությունը ներկա պահին վավերացրել են դաշինքի 31 երկրներ, այն հավանության չեն արժանացրել միայն Թուրքիան եւ Հունգարիան։ Փաստաթղթի շտապ վավերացման մասին պայմանավորվածությունը ձեռք է բերվել ՆԱՏՕ-ի, Թուրքիայի եւ Շվեդիայի միջեւ հուլիսին Վիլնյուսում կայացած ՆԱՏՕ գագաթաժողովից առաջ, բայց թուրքական կողմը այն ժամանակ մի շարք պայմաններ էր առաջադրել, ներառյալ համագործակցությունն ահաբեկչության դեմ պայքարում եւ ԵՄ-ի հետ տնտեսական եւ վիզային ինտեգրման արագացումը։
