ԱՄՆ նախագահ Ջո Բայդենը Թրամփի հետ հեռուստաբանավեճը սկսել է սխալից՝ հայտարարելով, որ նա ստեղծել է 15 հազար աշխատատեղ։ Ըստ Ամերիկայի ձայնի՝ այդ ցուցանիշը զգալիորեն իջեցրեց (նոր ստեղծված աշխատատեղերի իրական թիվն ավելի քան 15 միլիոն է) մի մարդ, որը փորձում էր տնտեսական առաջնորդությամբ վերականգնել ընտրողների վստահությունն իր նկատմամբ:

Բայդենը նաև ասել է. «Դա ինսուլինի ներարկման համար 15 դոլարն է, ոչ թե 400 դոլարը»: Մինչդեռ Medicare ծրագրից օգտվող տարեց ամերիկացիների գրպանից ինսուլինի ծախսերը ըստ 2022 թվականի գնաճի օգնության մասին օրենքի սահմանափակվել են 35 դոլարով, որը ստորագրել է նախագահ Ջո Բայդենը: Սահմանափակումն ուժի մեջ է մտել անցյալ տարի, երբ շատ դեղորայք արտադրողներ հայտարարեցին, որ մասնավոր ապահովագրություն ունեցող օգտվողների մեծ մասի համար կնվազեցնեն դեղամիջոցի գինը մինչև 35 դոլար:

Թրամփն էլ հայտարարել է, թե ամերիկյան տնտեսությունը պատրաստ էր սկսել մարելու իր ազգային պարտքը նույնիսկ համավարակից առաջ։ Դա ճիշտ չէ։ Բյուջեի դեֆիցիտը Թրամփի օրոք աճել էր, քանի որ 2017 թվականի նրա կողմից մտցված հարկերի կրճատումները չծածկեցին ծախսերը, ինչպես խոստացել էր Թրամփը: Ըստ Սպիտակ տան կառավարման և բյուջեի գրասենյակի, Թրամփը ժառանգել էր 585 միլիարդ դոլար բյուջեի դեֆիցիտ, որը 2019 թվականին աճել է, հասնելով մինչև 984 միլիարդ դոլարի, իսկ 2020 թվականին համավարակի հարվածից հետո գերազանցել է 3 տրիլիոն դոլարը:

Իսկ Թրամփի այն պնդումը, թե «միլիոնավոր» ներգաղթյալների թույլ են տվել երկիր մուտք գործել բանտերից ու հոգեբուժարաններից, հիմնավորված չէ։ Դրա մասին ոչ մի ապացույց չկա, գրում է Associated Press-ը։