Լոռու մարզպետ Արամ Ղազարյանը Ալավերդի համայնքի ղեկավար Դավիթ Ղումաշյանի ուղեկցությամբ օգոստոսի 6-ին, երեկոյան այցելել է Ալավերդի համայնքի Սանահին կայարան թաղամաս, հետևել այստեղ ընթացող նոր կամրջի կառուցման աշխատանքներին։ Հայտնում են Լոռու մարզպետարանի ֆեյսբուքյան էջում:

Ինչպես հայտնի է, պարսիկ գործընկերների հետ համագործակցութամբ, մեկնարկել են մետաղական կամրջի տեղադրման նախապատրաստական աշխատանքները։

Մարզի ղեկավարն այցելել է նաև թաղամասի՝ աղետից տուժած բնակիչների բնակարաններ, հետևել բնակարանների նորոգման աշխատանքների ընթացքին։

Մարզի ղեկավարի այցի հաջորդ կանգառը եղել է Ախթալայի կամրջից մինչև Ախթալայի երկաթուղային գծանց ընկած հատվածում, որտեղ ևս ավարտվել է գրունտային լիցքի տեղադրումը և ճանապարհը երկկողմանի երթևեկելի է։

Արամ Ղազարյանն այցն ամփոփել է Շնող բնակավայրում, որտեղ պետություն-համայնք համատեղ ներդրմամբ սուբվենցիոն ծրագրով իրականացվում են ներհամայնքային ճանապարհի ասֆալտապատման աշխատանքներ։ Ծրագիրն ավարտական փուլում է(պայմանագրային արժեքը շուրջ 356 մլն դրամ )։ Մարզի ղեկավարը կարևորել է աշխատանքները բարձր որակով իրականացնելու անհրաժեշտությունը։ Շնողում Ա․ Ղազարյանը զրուցել բնակիչների հետ, հետաքրքրվել նրանց առաջնային կարիքներով, խնդիրներով։