նախընտրելի դարձնել
Բրազիլիայում ձերբակալել են հինգ սպաների, որոնք մեղադրվում են հեղաշրջման փորձի մեջ, որը ներառում էր 2022 թվականի ընտրություններից հետո կառավարությունը տապալելու և նախագահ Լուիս Ինասիո Լուլա դա Սիլվային սպանելու ծրագրերը, հայտնում է Associated Press-ը։
Ըստ քննիչների՝ դավադիրները ծրագրել էին սպանել նաև փոխնախագահ Ջերալդո Ալկմինին և Գերագույն դատարանի դատավոր Ալեքսանդր դե Մորաեսին։ Բրազիլական լրատվամիջոցները հաղորդում են, որ հինգ ձերբակալվածների թվում են չորս զինվորական և մեկ ոստիկան:
Ոստիկանությունը հայտնել է, որ տրվել է հինգ ձերբակալման և երեք հետախուզման և առգրավման հրամանագրեր, ինչպես նաև այլ միջոցներ, ներառյալ կասկածյալների անձնագրերը առգրավելը և նրանց այլոց հետ շփումը կանխելը:
Դատավոր Ալեքսանդր դե Մորաեսը, որը թույլատրել է ձերբակալությունները, հայտարարել է, որ ոստիկանական հետաքննությունը ցույց է տվել, որ հեղաշրջման դավադրության մեջ ներգրավված են եղել բանակի հատուկ ջոկատներում վերապատրաստված զինվորներ և պաշտոնաթող բարձրաստիճան պաշտոնյա:
«Նպատակն էր կանխել պատշաճ կերպով ընտրված կառավարության երդմնակալությունը և խաթարել ժողովրդավարության ազատ իրականացումը և բրազիլական դատական համակարգի հեղինակությունը»,-ասված է դե Մորաեսի հրամանում: «Այս գործողությունները, որոնք գագաթնակետին հասան 2022 թվականի նոյեմբերից դեկտեմբեր ընկած ժամանակահատվածում, հեղաշրջում իրականացնելու ավելի լայն ծրագրի մի մասն էին»:
