նախընտրելի դարձնելԵրեւանում, այսօր` դեկտեմբերի 21-ին, բացվեց ՀՀ ոստիկանության անձնագրային եւ վիզաների վարչության Ավանի անձնագրային ծառայության հիմնանորոգված շենքը: Բացման արարողությանը ներկա էին Երեւանի քաղաքապետ Տարոն Մարգարյանը, ՀՀ ոստիկանության պետի տեղակալ, ոստիկանության գեներալ-մայոր Արթուր Օսիկյանը, բարձրաստիճան սպաներ, հյուրեր:
Ոստիկանության մամուլի ծառայությունից NEWS.am-ին հայտնում են, որ անձնագրային ծառայությունում քաղաքացիների սպասարկումն առավել քաղաքակիրթ, արդյունավետ եւ թափանցիկ իրականացնելու համար այսօր ստեղծվել են բոլոր նախապայմանները:
Նախկինում ծառայությունում գործում էր ԱՎՎ համակարգչային ցանցին միացված 2 համակարգիչ. վերանորոգումից հետո հատկացվել է եւս 4 համակարգիչ: Նախկինում անձնագրավարները գործառույթներն իրականացնում էին ըստ իրենց կողմից սպասարկվող տարածքների, ներկայումս ծառայություն դիմած քաղաքացիները սպասարկվելու են ըստ իրենց անհրաժեշտ ծառայությունների` ավելի արագ եւ առանց ավելորդ քաշքշուկների:
Տեղադրվել է անձնագրային ծառայությունների մատուցման համար նախատեսված պետական տուրքերը, վարչական տուգանքները եւ այլ վճարներն ընդունող էլեկտրոնային վճարային տերմինալ, ինչի շնորհիվ քաղաքացիների սպասարկումը զգալիորեն արագացել է: Ծառայությունում գործում է նաեւ լոկալ ջեռուցման համակարգ:
Շենքի նորոգման եւ տեխնիկական վերազինման աշխատանքներն իրականացվել են ՀՀ ոստիկանության անձնագրային եւ վիզաների վարչության արտաբյուջետային միջոցների հաշվին` առանց պետական բյուջեի միջոցների ներգրավման:
Ընդհանուր ծավալով ծախսերը կազմել են 13.005,0 հազար դրամ, այդ թվում՝ շիննորոգման աշխատանքներ` 11.445,0 հազար դրամ, համակարգչային տեխնիկա` 728,0 հազար դրամ, գույք` 832,0 հազար դրամ:
2012 թ. ընթացքում արտաբյուջետային միջոցների հաշվին նախատեսվում է իրականացնել անձնագրային եւ վիզաների վարչության Մասիսի անձնագրային բաժանմունքի նոր մասնաշենքի կապիտալ շինարարության աշխատանքները:
