նախընտրելի դարձնելԱմանորի եւ Սուրբ Ծննդյան տոների կապակցությամբ շնորհավորական ուղերձ է հղել «Երկրապահ կամավորականների միության» վարչության նախագահ, Արցախի հերոս, գեներալ-լեյտենանտ Մանվել Գրիգորյանը:
Շնորհավորական ուղերձում, մասնավորապես, ասվում է.
«Շնորհավորում եմ Ձեզ Ամանորի եւ Սուրբ Ծննդյան տոների կապակցությամբ:
Պատմության գիրկն անցավ եւս մեկ տարի:
Անցնող տարին, մեր ժողովրդի համար, լի էր տարաբնույթ իրադարձություններով: Իհարկե մեծագույն ձեռքբերումը խաղաղության պահպանումն էր: Այն խաղաղության, որը տարիներ առաջ ձեռք բերվեց ու պաշտպանվեց մեր ժողովրդի մաքառումների, մեծագույն զոհողությունների, հազարավոր մարտիկների կյանքի, առողջության եւ սխրանքների գնով:
Պետականության կայացման դժվարին գործընթացում իրենց ուրույն տեղն ունեն կամավորականները, երկրապահները, նրանք, ովքեր մարտադաշտում կռեցին մեր երկրի արժանապատիվ ապագան, ապահովելով Հայոց բանակի կազմավորումը, անկախության կայացումն ու հայ ժողովրդի անվտանգությունը:
Առանձնահատուկ շնորհավորում եմ բոլոր երկրապահ-ազատամարտիկներին:
Մենք` Սպարապետ Վազգեն Սարգսյանի հետնորդներս, պարտավոր ենք մշտապես պատվով կրել երկիրը պահողի ու շենացնողի սուրբ կոչումը, այն փոխանցելով նոր սերնդին: Մենք ընդունում ենք մեր երկրի ապագայի կերտման գործում մեր պատմական ու պատվաբեր պատասխանատվությունը: Մենք տեր ենք մեր երդմանը` ծառայել մեր պետականությանը, մեր երկրին ու մեր ժողովրդին:
Երկրապահը հավատարիմ իր պատվախնդիր կենսակերպին, հայոց բանակի հետ եղել է, կա ու պիտի մնա Արցախի եւ Հայաստանի անկախության երաշխավորը, պետականության ամրապնդման ջատագովը: Մեզ համար կարեւոր է ոչ միայն ձեռք բերումը, այլ նաեւ ձեռք բերածի պահպանումը եւ այն նոր սերնդին փոխանցումը:
Շնորհավորում եմ Հայոց բանակի զինծառայողներին, հատկապես այսօր երկրի սահմանը պահող հայ զինվորին:
Մեր ջերմ շնորհավորանքներն ենք հղում ողջ արցախահայությանը, հերոսներ ծնող Արցախի մայրերին, Արցախը շենացնողներին: Թող էլ ավելի ամրապնդվի արցախահայության իր հողում ազատ ու անկախ ապրելու հավատը:
Ամանորի եւ Սուրբ ծննդյան տոների առթիվ, կուզենայի բոլոր երկրապահների անունից առանձնահատուկ շնորհավորել մեր զոհված մարտական ընկերների հերոսական մայրերին, քույրերին, կանանց, երեխաներին: Մենք գնահատում եւ խոնարհվում ենք մեր մայրերի ոգու եւ հայրենասիրության առաջ, որով նրանք դաստիարակել են իրենց քաջ որդիներին:
Եկեք Ամանորի առիթով մեկ անգամ եւս գլուխ խոնարհենք Եռաբլուրի առաջ, բոլոր նրանց հիշատակի առաջ, ովքեր զոհվեցին հանուն Հայաստանի եւ Արցախի անկախության ու ազատության£ Նրանք երազում էին հաղթանակած Հայաստան, անկախ Արցախ ու տեր էին կանգնում իրենց երազանքին: Այսօր մենք պարտավոր ենք իրականություն դարձնել մեր մարտական ընկերների երազանքը, ունենալ բարեկեցիկ Հայաստան ու անկախ, հզոր Արցախ:
Սիրելի հայրենակիցներ, ուզում եմ հատուկ շնորհավորել մեր երեխաներին, մեր թոռներին, երիտասարդ ու պատանի երկրապահներին: Մենք պարտավոր ենք հավատալ մեր երիտասարդությանը, մատաղ սերնդին:
Նոր տարին նոր նվաճումների ժամանակաշրջան է լինելու: Թող միշտ տոնական լինի մեր տրամադրությունը եւ մեզ չլքի էլ ավելի ժողովրդավար, հզոր ու կայուն պետություն ստեղծելու հավատը: Թող մեզ առաջնորդի դժվարությունները հաղթահարելու կամքը եւ լավը, առաջընթացը տեսնելու, գնահատելու լավատեսությունը:
Թող 2012թ. լինի միասնության, համայն հայության համախմբման, անկախության ամրապնդման եւ պետության հզորացման տարի: Մեր հզորությունը մեր միասնության մեջ է:
Շնորհավոր Ամանոր եւ Սուրբ Ծնունդ:
Աստված բոլորիս պահապան»:
