Կոլումբիայի խաղաղօվկիանոսյան ափին ուրբաթ օրը կոկաինի արտադրության լաբորատորիայում տեղի ունեցած պայթյունի հետևանքով ինը մարդ է զոհվել, հայտնում է AFP-ն:

Պայթյունը տեղի է ունեցել Նարինիո դեպարտամենտի հարավ-արևմուտքում՝ կոկաինի արտադրության տարածքում, որտեղ բնակվում է ավա բնիկ ժողովուրդը և որը լի է անօրինական զինված խմբավորումներով:

Ութ մարդ վիրավորվել է։

Նախնական քննությունը ցույց է տվել, որ թմրանյութի պատրաստման ժամանակ գազի բալոն է պայթել, տեղական լրատվամիջոցներին հայտնել է ոստիկանության գնդապետ Ջոն Հայրո Ուրեան։

Խմբավորումը մերժել է FARC-ի հետ 2016 թվականի խաղաղության համաձայնագիրը, որը վերջ էր դրել տասնամյակներ տևած մարտական գործողություններին, և շարունակում է բանակցությունները նախագահ Գուստավո Պետրոյի կառավարության հետ: Տարածաշրջանը, որտեղ պայթել է լաբորատորիան, տասնամյակներ շարունակ վճռորոշ նշանակություն է ունեցել դեպի ԱՄՆ կոկաինի մաքսանենգության համար, իսկ թմրամաքսանենգներն ուժեղացրել են իրենց վերահսկողությունը տեղում՝ մեքսիկական կարտելների օգնությամբ:

Էկվադորի պահպանողական նախագահ Դանիել Նոբոան չորեքշաբթի առևտրային պատերազմ է սկսել Կոլումբիայի հետ՝ 30 տոկոս մաքսատուրք սահմանելով հարևան երկրից ներկրվող ապրանքների համար։ Նա մեղադրել է նախագահ Գուստավո Պետրոյի կառավարությանը՝ ընդհանուր սահմանի երկայնքով թմրամիջոցների ապօրինի շրջանառությունը կասեցնելու ուղղությամբ անբավարար միջոցներ ձեռնարկելու մեջ։

Պետրոն ի պատասխան սահմանել է նույն սակագինը և պաշտպանել թմրամիջոցների ապօրինի շրջանառության դեմ պայքարում իր գործադրած ջանքերը:

ԱՄՆ նախագահ Դոնալդ Թրամփի համանման մեղադրանքներից հետո Պետրոն ծրագրում է փետրվարի 3-ին մեկնել Վաշինգտոն՝ ամերիկացի գործընկերոջ հետ հանդիպելու համար: