նախընտրելի դարձնել
Տրիկալա քաղաքում «Վիոլանտա» թխվածքաբլիթների գործարանում տեղի ունեցած պայթյունի եւ հրդեհի հետեւանքով չորս մարդ զոհվել է, մեկը՝ անհետ կորել։ Այս մասին տեղեկացրել է հունական ERT-news հեռուստաալիքը։
Հաղորդագրության համաձայն՝ պայթյունը տեղի է ունեցել տեղի ժամանակով ժամը 4:00-ին (Մոսկվայի ժամանակով ժամը 5:00-ին), որին հաջորդել է խոշոր հրդեհ։ Դեպքի վայր են ժամանել հրշեջներ եւ ոստիկանության հանցագործությունների դեմ պայքարի բաժնի մասնագետներ։ Դեպքի պահին գործարանում գտնվել է 12-13 մարդ, որտեղ վառարաններն աշխատել էին շուրջօրյա։ Տեղի ժամանակով ժամը 9:00-ից հետո հրշեջները հայտնաբերել են նախկինում անհետ կորած հինգ կանանցից երեքի մարմինները, իսկ չորրորդ զոհի մարմինը հայտնաբերվել է ավելի ուշ։ Մեկ այլ կին մնում է անհետ կորած։
Նախնական քննության վարկածով՝ պայթյունը կարող էր առաջացած լինել գործարանում առկա ամոնիակի եւ պրոպանի պատճառով։
«Գործարանի վեց աշխատողներ եւ մեկ հրշեջ ուղարկվել են Տրիկալայի հիվանդանոց, հիմնականում որպես նախազգուշական միջոց։ Նրանց վնասվածքները լուրջ չեն։ Մենք նաեւ երկու հոգեբան ենք ուղարկել Կարդիցայի հիվանդանոցից՝ նրանց եւ նրանց ընտանիքներին հոգեբանական աջակցություն ցուցաբերելու համար»,- ասել է Հունաստանի առողջապահության նախարար Ադոնիս Գեորգիադիսը։
Հունաստանի ոստիկանության մամուլի քարտուղար Կոնստանտիա Դիմոգլիդուն նշել է, որ դեպքի վայրում մնում են մեծ թվով հրշեջներ, որոնք փորձում են վերահսկել գործարանի ներսում բռնկված հրդեհը։
