Ազգային ժողովի ՀՀԿ խմբակցության պատգամավոր, Արցախի հերոս, ԵԿՄ նախագահ, գեներալ-լեյտենանտ Մանվել Գրիգորյանը պետք է «բորենիներին տխրեցնի», քանի որ նրանց «խրախճանքի ժամը շատ հեռու է», ավելին` չի էլ գալու: Այս մասին NEWS.am-ի թղթակցի հետ զրույցում ասաց Մանվել Գրիգորյանի խորհրդական Վարդան Վարդանյանը՝ արձագանքելով այն տեղեկություններին, թե Մանվել Գրիգորյանի առողջական խնդիրների պատճառով ԵԿՄ նախագահը փոխվելու է:
«Նման երազանքներով ապրողները եւ այդ լուրերը տարածողնեը, քանի որ մանր-մունր մարդիկ են, չեն պատկերացնում, որ բնության մեջ կարող է ուժեղ, պինդ մարդ էլ գոյություն ունենալ: Իսկ գեներալ Մանվելն այնքան ուժեղ է եղել, որ պատերազմում անհավասար մարտերում հաղթել է թուրքին: Այս դեպքում էլ ուժեղ եւ պինդ կանգնած է եւ անձամբ ղեկավարում է ԵԿՄ-ն: Անձամբ էլ անցկացնում է բոլոր խորհրդակցությունները, հանձնարարականներ է տալիս եւ ստուգում դրանք»,- նշեց Վարդան Վարդանյանը:
Անդրադառնալով առողջական խնդիրներին, Մանվել Գրիգորյանի խորհրդականը նշեց, որ հիվանդանոցից դուրս գալուց հետո Մանվել Գրիգորյանը իրեն շատ լավ է զգում: «Իսկ ԵԿՄ կառույցը ոչ թե 25, այլ 35 հազար անդամ ունի: Բացի ուժեղ լինելուց գեներալ Մավել Գրիգորյանը նաեւ պատասխանատու մարդ է եւ շատ լուրջ է վերաբերում է, որ Վազգեն Սարգսյանի ողբերգական սպանությունից հետո երկրապահական ընտանիքը հենց իրեն համարեց միակ արժանին ղեկավարելու Վազգեն Սարգսյանից հետո այդ կառույցը: Ինքը չի կարող հենց այնպես այդ պատասխանատվությունից հրաժարվել»,- ասաց Վարդան Վարդանյանը:
Ի դեպ, խորհրդականը հայտնեց, որ ԵԿՄ կանոնադրության համաձայն ընտրությունները 2 տարին մեկ են անցկացվում: Իսկ հերթական ընտրությունները տեղի են ունենալու 2014թ-ի փետրվարին: Եվ մինչեւ հիմա միաձայն Մանվել Գրիգորյանն է ընտրվել ԵԿՄ նախագահ:
Ավելի վաղ տեղեկացրել էինք, որ «Ժամանակի» տեղեկություններով՝ իշխանությունները մտադիր են Երկրապահ կամավորական միությունը հանձնել պաշտպանության նախարար Սեյրան Օհանյանին, այսինքն՝ նրան նշանակել ԵԿՄ նախագահ: Թերթի տեղեկություններով՝ ամռանը Գերմանիայում վիրահատված, բայց Հայաստան վերադառնալուց հետո կրկին հիվանդանոց տեղափոխված ԵԿՄ նախագահ Մանվել Գրիգորյանը օրերս հանդիպել է ԵԿՄ պատասխանատուների հետ եւ տեղեկացրել, որ առողջական խնդիրների պատճառով միգուցե հրաժարվի նախագահությունից: Թերթի տեղեկություններով իշխանությունները որոշել են ավելի քան 25000 անդամ ունեցող կառույցն ամբողջությամբ իրենց ազդեցության տակ պահելու համար նախագահ նշանակել Ս. Օհանյանին:
