Հոլանդիայի քաղաքացին չինական Չանշա քաղաքի հիվանդանոց է փոխադրվել այն բանից հետո, երբ ժամանումից հետո 10 օր շարունակ տեղի օդանավակայանում սպասել է ընկերուհուն: Այս մասին գրում է ՌԻԱ Նովոստին՝ վկայակոչելով տեղական լրատվամիջոցները:
Ամստերդամի 41-ամյա բնակիչը երկու ամիս առաջ համացանցում 26-ամյա չինուհու հետ է ծանոթացել: Կարճ ժամանակ անց որոշել է այցելել նրան: Սակայն աղջիկն օդանավակայանում չի դիմավորել տղամարդուն, ինչից հետո վերջինը հրաժարվել է տուն վերադառնալ եւ որոշել է օդանավակայանում սպասել ընկերուհուն:
Արդյունքում շաքարախտով հիվանդ հոլանդացին 10 օր օդանավակայանում է անցկացրել եւ հոսպիտալացվել է:
Աղջկա խոսքով՝ հոլանդացին չի զգուշացրել ժամանման մասին, եւ տեղի ունեցածի մասին ինքն իմացել է լրատվամիջոցներից:
Տղամարդու վիճակը կայունացել է, բայց նա ստիպված կլինի շուտով հեռանալ Չինաստանից, քանի որ վիզայի ժամկետը լրանում է: Աղջիկը վստահեցրել է, որ կփորձի շարունակել իրենց հարաբերությունները:
