«Դատապարտյալների հիվանդանոց» ՔԿՀ–ում գտնվող՝ «Սասնա ծռերի» անդամ Աշոտ Պետրոսյանն այսօր՝ օգոստոսի 8-ին, հանդիպել է կոմպոզիտոր Տիգրան Մանսուրյանի հետ եւ դադարեցրել 4 օր առաջ սկսած հացադուլը: Այս մասին NEWS.am-ին ասաց Աշոտ Պետրոսյանի պաշտպան Արայիկ Պապիկյանը՝ նշելով, որ Աշոտ Պետրոսյանն արդեն բուժօգնություն է ստանում, որից հրաժարվել էր հացադուլի ժամանակ:
Փաստաբանը տեղեկացրեց, որ կոմպոզիտորն ու Աշոտ Պետրոսյանը զրուցել են մոտ 2 ժամ: Նա նաեւ նշեց, որ թեեւ Աշոտ Պետրոսյանը դադարեցրել է հացադուլը, բայց կփորձեն հանդիպում կազմակերպել նաեւ նրա ու կոմպոզիտոր Ռոբերտ Ամիրխանյանի միջեւ:
Հիշեցնենք, որ հանդիպման թույլտվությունը ստացվել էր այսօր:
Ավելի վաղ տեղեկացրել էինք, որ «Սասնա ծռերի» անդամ, նկարիչ Աշոտ Պետրոսյանը, որ հրազենային վնասվածք ունի, ցանկանում է հանդիպել կոմպոզիտորներ Տիգրան Մանսուրյանի եւ Ռոբերտ Ամիրխանյանի հետ: Նա օգոստոսի 4-ից հայտարարել է հացադուլ եւ հրաժարվել բուժօգնությունից:
Աշոտ Պետրոսյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է: