Վայոց ձորի Ջերմուկ քաղաքում բժշկի կողմից մասնագիտական պարտականությունները ոչ պատշաճ կատարելու հետեւանքով հիվանդին մահվան հասցնելու գործով դատավճիռը բեկանվել է:
NEWS.am-ի տեղեկություններով, օրերս Վերաքննիչ քրեական դատարանը բավարարել է մեղադրող Գայանե Խաչիկյանի բողոքն ու վերացրել է 70-րդ հոդվածի կիրառմամբ պայմանականորեն չկիրառելը՝ թողնելով կրելու պատիժ ազատազրկման ձևով` 2 տարի ժամկետով` բժշկական գործունեությամբ իրավունքի զրկմամբ` 3 տարի ժամկետով:
Հիշեցնենք, որ ըստ մեղադրանքի՝ Ջերմուկի առողջության կենտրոնի «Շտապօգնության» բժիշկ Արտակ Գեւորգյանը 2016թ. նոյեմբերի 3-ին Գրիգոր Գրիգորյանին առաջին բուժօգնություն ցուցաբերելու ընթացքում իր մասնագիտական պարտականությունները կատարել է ոչ պատշաճ՝ դրանց նկատմամբ դրսևորելով անփույթ և անբարեխիղճ վերաբերմունք, ինչն անզգուշությամբ առաջացրել է Գրիգոր Գրիգորյանի մահը: Այսպես, Արտակ Գևորգյանը հիվանդ Գրիգոր Գրիգորյանից տեղեկացել է, որ սրտի շրջանում ունի ցավեր և ցանկանում է անցնել էլեկտրասրտագրության հետազոտություն: Առանց էլեկտրասրտագրություն կատարելու՝ բժիշկը բուժքրոջը ցուցում է տվել կատարել դեղորայքային ներարկում: Դա լսելով՝ Գրիգոր Գրիգորյանը և նրա ընտանիքի անդամները տեղեկացրել են հիվանդի՝ դեղորայքից ալերգիկ լինելու մասին: Սակայն Արտակ Գեւորգյանը ցուցում է տվել կատարել ներարկումը: Ներարկումից անմիջապես հետո Գրիգոր Գրիգորյանի մոտ առաջացել է շոկային վիճակ, նա կորցրել է գիտակցությունը: Դրանից հետո նույնպես, ըստ մեղադրանքի, Արտակ Գեւորգյանն առաջին օգնության պրեպարատի՝ ադրենալինի ներարկման ձևի և չափաքանակի վերաբերյալ բուժքրոջը տվել է ոչ ճիշտ ցուցում: Բժշկի ցուցումով կատարված ներարկումներից հետո Գրիգորյանը րոպեներ անց մահացել է:
