նախընտրելի դարձնել«Մեր քաղաքը» հանրային-քաղաքացիական նախաձեռնությունը հանդես է եկել հայտարարությամբ, որտեղ անդրադառնում է Երեւանի Նալբանդյան 106/1 ներբակային տարածքում բազմահարկ շենքերի կառուցման վիճահարույց ծրագրին:
Հայտարարությունում ասվում է.
«Թումանյան, Նալբանդյան, Սայաթ Նովայի պողոտա եւ Ավագ Պետրոսյան փողոցների բնակիչները կրկին ստորագրահավաք են կազմակերպել՝ ընդդեմ նշված փողոցներով պարփակված ներբակային տարածքում նախատսվող բազմահարկ-բազմաֆունկցիոնալ շենքերի շինարարության: Նշենք, որ բնակիչները արդեն երկու տարի բողոքում են իրենց բակում նախատեսվող հսկայածավալ շինարարության դեմ, որի հետեւանքով կվերանան բակի տասնյակ հաստաբուն ծառեր, իսկ ՀՀ Արտակարգ իրավիճակների նախարարության Սեյսմիկ պաշտպանության ազգային ծառայության պաշտոնական գրությունից բխում է, որ նախքան շինարարությունը անհրաժեշտ կլինի ամրացնել շրջակա բնակելի շենքերի հիմքերը:
Եթե այս հարցով նախորդ ստորագրահավաքին մասնակցել էր 160 բնակիչ, ապա այս անգամ արդեն ավելի քան 270 բնակիչ, ովքեր միացել են ստորագրահավաքին՝ հուսալով, որ այս անգամ գոնե իրենց պահանջը անարձագանք չի մնա:
Ստորագրահավաքի տեքստում մասնավորապես ասված է. «Մեծարգո պարոն նախագահ, 2012թ. նախընտրական քարոզարշավի ընթացքում՝ Էրեբունի համայնքում ընտրողների հետ հանդիպման ժամանակ, Դուք հայտարարեցիք. «Մենք օրենքով բացառելու ենք Երեւանի կենտրոնի որեւէ կառուցապատում, եթե այն չի պատշաճում մայրաքաղաքի ճարտարապետությանը: Այսօր ակնհայտ է, որ կա հասարակական լուրջ պահանջարկ եւ նույնիսկ պայքար այս հարցում: Այստեղ մենք դաշնակիցներ ենք: Մի քանի տարի, եւ Երեւանում վերջնականապես կհաղթահարի մայրաքաղաքի դիմագիծը պահելու առաջնահերթությունը»:
Երեւանի քաղաքապետ Տարոն Մարգարյանն իր հերթին 2011 դեկտեմբերի 20-ին Հայաստանի Ճարտարապետների միության անդամների հետ հանդիպման ժամանակ նշել է, որ քաղաքաշինական խոշոր բոլոր նախագծերը եւ այս ուղղությամբ կատարվող ներդրումները Կենտրոնից նախատեսվում է տեղափոխել վարչական այլ շրջաններ:
Խնդրում ենք, հավատարիմ լինելով այս խոստումներին, վերջնականապես դադարեցնել Նալբանդյան 106/1 ներբակային տարածքում «Ավագ Շին» ՍՊԸ-ի կողմից նախատեսվող բազմահարկ, բազմաֆունկցիոնալ շենքերի վիճահարույց շինարարության ծրագիրը, որն իրականացնելու որոշմամբ ՀՀ կառավարւթյան կողմից խախտվել են գործող մի շարք օրենքներ եւ որը սպառնում է շրջակա շենքերի բնակիչներին զրկել առողջ կենսամիջավայրից, բակում առկա կանաչ տարածքից, բազմաթիվ հաստաբուն ծառերից, ինչպես նաեւ խտացնել բնակչության թիվը, ծանրաբեռնել կոմունիկացիոն գծերն ու կոյուղին, մեծացնել շրջակա շենքերի նկատմամբ սեյսմիկ ռիսկերը:
Մենք հստակ առաջարկ ենք ներկայացրել Երեւանի քաղաքային իշխանություններին՝ Երեւանի գլխավոր ճարտարապետի հետ հանդիպման ժամանակ: Առաջարկել ենք եւ պահանջել այլընտրանքային տարածք հատկացնել կառուցապատողին՝ բարձրահարկ բազմաֆունկցիոնալ շենքերի կառուցման համար՝ միաժամանակ վերոհիշյալ տարածքում վերականգնելով ցածրահարկ մանկապարտեզը եւ կանաչ գոտին, որից օգտվում էին շրջակա շենքերի հարյուրավոր ընտանիքներ»:
Նշենք, որ այս տեքստը, որին կցված են եղել առանձին դիմումներ ՀՀ նախագահի, վարչապետի եւ Երեւանի քաղաքապետի անունով, մուտքագրվել է ս.թ. ԱԺ ընտրությունների նախօրեին: Ըստ բնակիչներից ստացած տեղեկությունների՝ իրենք առայժմ որեւէ արձագանք չեն ստացել՝ բացի քաղաքապետարանից ստացված կցկտուր մի գրության, որով ասվում է, թե կառուցապատման աշխատանքներին վերաբերող փաստաթղթերը դեռեւս մշակման փուլում են:
Միեւնույն ժամանակ անհասկանալի կերպով արդեն այսօր տարածքում հայտնվել են անձինք, ովքեր իրենց ասելով թույլտվություն են ստացել քաղաքապետարանի կողմից՝ գազատար խողովակի տեղափոխման աշխատանքներ իրականացնելու համար, որպեսզի ապահովվի կռունկի եւ շինարարական տեխնիկայի մուտքը դեպի ներբակային տարածք:
Մինչ այս խնդրի սպառիչ պատասխան ստանալը՝բնակիչները պատրաստվում են հունիսի 1-ին հերթական բողոքի ակցիան կազմակերպել Նալբանդյան 106/1 հասցեում՝ ներբակային անցանկալի շինարարության դեմ»:
