նախընտրելի դարձնելԵրեւանի բնակիչ Գրիգոր Ղազարյանի գազի հաշվիչը 2012թ-ի մարտին «ՀայՌուսգազարդ» ՓԲԸ-ի աշխատակիցները փոխարինել են նորով, որից հետո քաղաքացուց պահանջել են վճարել հավելյալ գումարներ` պատճառաբանելով, որ հին հաշվիչը գտնվել է անսարք վիճակում: Այս մասին NEWS.am-ի թղթակցի հետ զրույցում ասաց Գրիգոր Ղազարյանը:
Վերջինս նրանց անօրինական պահանջը կատարելու փոխարեն դիմել է ՀՀ մարդու իրավունքների պաշտպան Կարեն Անդրեասյանին: Գործն ուսումնասիրելով, պաշտպանը դիմել է ՀՀ հանրային ծառայությունները կարգավորող հանձնաժողովի նախագահին:
Պաշտպանի գրությանն ի պատասխան` ՀՀ հանրային ծառայությունները կարգավորող հանձնաժողովի նախագահը հայտնել է, որ հանձնաժողովի հանձնարարությամբ «ՀայՌուսգազարդ» ՓԲԸ-ն քննարկել եւ դրական լուծում է տվել քաղաքացու դիմումում բարձրացված հարցին` անվճար տրամադրելով քաղաքացուն իր հասանելիք գազի հաշվիչը:
NEWS.am-ի թղթակցի հետ զրույցում Գրիգոր Ղազարյանը նշեց, որ իր օրինակով քաղաքացիները կարող են պայքարել անօրինական պահանջների դեմ:
