նախընտրելի դարձնելՌուսաստանից Վերակառուցման եւ զարգացման եվրոպական բանկի նախկին տնօրեն Ելենա Կոտովան եւ ՎՏԲ-ի նախկին ավագ փոխնախագահ Իգոր Լեբեդեւը մեղադրվում են առեւտրային կաշառք վերցնելու փորձի մեջ:
Քննիչները կարծում են, որ նրանք մտադիր էին 95 միլիոն դոլար ստանալ՝ ընկերությանը վարկ ստանալու հարցում աջակցելու համար, գրում է «Կոմերսանտը»:
Ենթադրվում է, որ ՎԶԵԲ-ի տնօրենների խորհրդի անդամ Կոտովան գործարարներին վարկի տրամադրման դրական վճիռ է երաշխավորել` տրամադրված գումարի 1,5%-ի չափով «ատկատի» դիմաց, որը մոտավորապես 1,42 միլիոն դոլար էր կազմում:
ՎԶԵԲ-ում կոռուպցիոն սկանդալը ծագել էր 2010թ. դեկտեմբերին: Պարզվել է, որ ՎԶԵԲ-ի ներքին անվտանգության ծառայությանն էր դիմել ՌԴ-ի Հանրային պալատի նախկին անդամ եւ ռուսաստանցի, այժմ Կանադայի քաղաքացի Սերգեյ Չերնիկովը`հանքարդյունահանող CanBaikal Resources ընկերության սեփականատերը:
Նա բողոքել էր, որ ՎԶԵԲ-ում Ռուսաստանի ներկայացուցիչն իրենից գումար է պահանջել` վարկ տրամադրելու դրական որոշումն ապահովելու դիմաց: Սեփական ստուգումների նյութերը բանկը փոխանցել էր Սքոթլանդ Յարդին, որից հետո պատմությունը հանրային արձագանք էր ստացել:
Ըստ քննության վերջնական վարկածի` վարկ ստանալու բանակցությունները տարվել են մեկ տարի, որպես միջնորդ հանդես է եկել ՎՏԲ-ի նախկին ավագ փոխնախագահ Իգոր Լեբեդեւը: Կոտովան մինչեւ Ռուսաստանից ՎԶԵԲ-ի տնօրեն նշանակվելը 2005թ. մայիսին եղել է ՎՏԲ-ի փոխնախագահ:
Ըստ Կոտովայի փաստաբան Սերգեյ Միրզոյեւի` հետաքննության ընթացքում իր պաշտպանյալի մեղքի ապացույց դեռեւս չի հայտնաբերվել: Նա կարծում է, որ Կոտովայի մասնակցությամբ աղմուկը քաղաքական ենթատեքստ ունի, քանի որ նրա պաշտոնը ոչ բոլորին է ձեռնտու եղել:
