Հունվարի 18-ին ՊՆ Ռազմական ոստիկանության օպերատիվ-հետախուզական բաժին է հրավիրվել քաղաքացի Կ.Ս-ն` ձեռնարկված օպերատիվ-հետախուզական միջոցառումների արդյունքում: Քաղաքացին հայտարարել է, որ 2012 թվականի դեկտեմբերին քաղաքացի Ա.Բ-ին տվել է խոշոր չափի գումար, որպեսզի վերջինս, իբր պետական մուծումներ կատարելով, իր եղբոր որդուն օրինական ճանապարհով ազատի զինծառայությունից:  Ա.Բ-ն վերցրած գումարի դիմաց Կ.Ս-ին փոխանցել է զինծառայությունից ազատվելու վերաբերյալ կեղծ բժշկական փաստաթուղթ: Ըստ տրված հայտարարության` ՌՈ է բերման ենթարկվել Ա.Բ-ն, ով խոստովանել է, որ նմանօրինակ խարդախության միջոցով գումարներ է շորթել նաեւ այլ քաղաքացիներից: Նախապատրաստված նյութերով ՊՆ քննչական ծառայությունում հարուցվել է քրեական գործ:

Եթե կան այլ քաղաքացիներ, ովքեր տուժել են տվյալ անձի խաբեություններից, կարող են դիմել ՊՆ ռազմական ոստիկանություն կամ քննչական ծառայություն:

Հիշեցնենք նաեւ, որ խարդախության նմանօրինակ դեպք էր բացահայտվել հունվարի 13-ին եւ այդ առնչությամբ հարուցվել էր քրեական գործ:

ՊՆ ռազմական ոստիկանությունը ՀՀ քաղաքացիներին եւս մեկ անգամ զգուշացնում է զերծ մնալ հանցավոր գործարքներից, նմանաբնույթ դեպքերում դատապարտելի են ոչ միայն քրեածին տարրերի, այլեւ այն ծնողների վարքը, ովքեր, կուլ գնալով գայթակղիչ առաջարկներին, փորձում են իրենց զավակներին զերծ պահել զինծառայությունից կամ տեղավորել իրենց բնակավայրին մոտիկ զորամասերում: