Հայաստանի նախագահին կից Հանրային խորհրդի Երիտասարդության ենթահանձնաժողովը նամակով դիմել է ԿԳ նախարար Արմեն Աշոտյանին, որտեղ անդրադառնում է 5 բուհերում ուսման վարձերի թանկացման խնդրին:

Նամակում, մասնավորապես, ասվում է.

«Հայաստանի նախագահին կից Հանրային խորհրդի Երիտասարդության ենթահանձնաժողովը, մտահոգված լինելով ՀՀ 5 բուհերում ուսման վարձերի թանկացման խնդրով, մի շարք ուսանողների  անունից խնդրում է  Ձեզ վերահսկողություն հաստատել եւ ի բարօրություն մեր երկրի երիտասարդ սերնդի ապագայի փոխշահավետ լուծում տալ այս հարցին:

2013 -2014թթ. ուս.տարվա ուսման վարձերի թանկացումներ են ակնկալվում ՀՀ հետեւյալ բուհերում`

• Երեւանի պետական համալսարանում,

• Հայաստանի պետական տնտեսագիտական համալսարանում,

• Երեւանի Կոմիտասի անվ. պետական կոնսերվատորիայում,

• Երեւանի ճարտարապետության եւ շինարարության պետական համալսարանում,

• Հայաստանի պետական ճարտարագիտական համալսարանում:

Սպասվելիք 20-100 հազար դրամի փոխարեն վարձերը բարձրացել են 100 – 200 հազար ՀՀ դրամով: Հարկ է նշել, որ բուհերում վարձերի թանկացումը շատ ծանր կանդրադառնա առանց այդ էլ ծանր վիճակում գտնվող հայ ընտանիքների վրա եւ անմիջական ազդեցություն կունենա թե քանակական, թե որակական առումներով: 

Նախեւառաջ բարձր վարձավճարի արդյունքում  նվազելու է բուհ ընդունվողների քանակը, քանի որ ընդունվել կարողանալու են միայն վճարունակ ընտանիքների երեխաները, ինչն իր հերթին ազդելու է ուսման որակի վրա: Բացի այդ, սոցիալապես անապահով ընտանիքների համար նախատեսված արտոնությունները դժվար թե լինեն բավարար բոլորի համար: Այս պահին բավարար եւ արդյունավետ կհամարվի միայն ուսման նախկին վարձավճարին վերադառնալը, քանի որ վարձերի բարձրացումով չեն  լուծվի ո՛չ կոռուպցիայի հետ կապված խնդիրները, ոչ էլ  ներբուհական   ոչ արդյունավետ  կառավարումը:

Կրթությունը հանդիսանում է ՀՀ պետական քաղաքականության կարեւորագույն ճյուղերից մեկը եւ ունի ռազմավարական նշանակություն: Կառավարությունը մեկ անգամ չէ, որ նշել է պետության զարգացման եւ բարգավաճման գործընթացում «մարդկային կապիտալի» կարեւորության մասին:

Այսպիսով, խնդրում ենք Ձեզ  օրակարգ մտցնել այս խնդրի  շուտափույթ լուծման հարցը` հաշվի առնելով հայ երիտասարդության` մասնավորապես ուսանողների կարծիքը:

Հուսով ենք, որ մեր ձայնը լսելի կլինի, իսկ արդյունքները կլինեն գոհացուցիչ»: