Եվրասիական միությանը եւ Մաքսային միությանն անդամագրումը վտանգում է Հայաստանի Հանրապետության անկախությունը եւ նրա` որպես ինքնիշխան պետության գոյությունը: Նման բովանդակությամբ հայտարարություն է տարածել «Հանրապետություն» կուսակցությունը:

Հայտարարությունում ասվում է.

«Հանրապետություն» կուսակցությունը Հայաստանի Հանրապետության` Մաքսային միության անդամակցության եւ այդ քայլով գործնականում եվրաինտեգրման իր հայտարարած կուրսից հրաժարվելու կապակցությամբ,

արձանագրում է 

1. Մաքսային միությանն անդամակցելու որոշումը հետեւանք է Հայաստանում գործող իշխանությունների համակարգային փոփոխություններից խուսափելու ձգտման, այլ ոչ թե` արտաքին ճնշումների:

2. Լեռնային Ղարաբաղի հարցը մեր հաղթանակների խորհրդանիշն է, եւ հնարածին ու անթույլատրելի է այն ներկայացնել` որպես ներկայիս դժվարությունների եւ բացթողումների պատճառ:

3. Եվրասիական միությանը եւ Մաքսային միությանն անդամագրումը վտանգում է Հայաստանի Հանրապետության անկախությունը եւ նրա` որպես ինքնիշխան պետության գոյությունը:

Ելնելով այս ամենից, «Հանրապետություն» կուսակցությունը, նպատակ ունենալով համակարգային փոփոխությունների, ժողովրդավարության հաստատման, մարդու իրավունքների եւ հիմնարար ազատությունների պաշտպանության միջոցով Հայաստանի Հանրապետությունը տանել եվրաինտեգրման խորացման ուղությամբ

Հայտարարում է

շահագրգիռ բոլոր քաղաքական կուսակցությունների, հասարակական կազմակերպությունների, հասարակական եւ քաղաքական գործիչների հետ քննարկումների գործընթաց սկսելու մասին: