նախընտրելի դարձնել
Հայաստանի նախագահ Սերժ Սարգսյանին այսօր՝ դեկտեմբերի 11-ին, իր հավատարմագրերն է հանձնել Հայաստանում Լատվիայի Հանրապետության նորանշանակ արտակարգ եւ լիազոր դեսպան Էլիտա Գավելեն (նստավայրը՝ Թբիլիսի):
Նախագահը շնորհավորել է դեսպան Գավելեին պաշտոնն ստանձնելու կապակցությամբ, մաղթել հաջողություններ եւ հույս հայտնել, որ մեր երկրում դիվանագիտական առաքելությունն իրականացնելիս նա կանի ամեն հնարավորը իր մասնագիտական կարողություններն ու փորձը ի նպաստ Հայաստանի եւ Լատվիայի միջեւ հարաբերությունների ամրապնդման ներդնելու համար:
Հանդիպմանը երկուստեք կարեւորվել է հայ-լատվիական համագործակցությունը ինչպես երկկողմ, այնպես էլ բազմակողմ ձեւաչափով:
Դեսպան Էլիտա Գավելեն իր երկրի անունից պատրաստակամություն է հայտնել 2015թ. առաջին կիսամյակում Լատվիայի ԵՄ նախագահության շրջանում եւս սերտորեն համագործակցել Հայաստանի հետ եւ անհրաժեշտության դեպքում աջակցել՝ ընդգծելով, որ այդ ժամանակաշրջանում Արեւելյան գործընկերությունը Լատվիայի համար լինելու է առաջնահերթություններից մեկը:
Զրուցակիցները քննարկել են Հայաստանի եւ Լատվիայի միջեւ քաղաքական երկխոսության ակտիվացմանը, փոխադարձ հետաքրքրություն ներկայացնող մի շարք ոլորտներում համագործակցության զարգացմանը վերաբերող հարցեր:
Հանրապետության Նախագահը եւ Լատվիայի դեսպանը մտքեր են փոխանակել նաեւ տարածաշրջանային խնդիրների շուրջ:
