ԱՄՆ-ում ամուսինն իրենց իսկ տանը սպանել է հիվանդ կնոջը, ավելի ուշ գնացել է Լոս Անջելեսի հիվանդանոց եւ սպանել  իր 58-ամյա հաշմանդամ քրոջը:  Ոստիկանությունը չի բացառում, որ սպանությունները խղճահարությունից դրդված են կատարվել:

Ըստ քննիչների՝ 60-ամյա Լենս Անդերսոնը քրոջը կրակել է նրա տառապանքներին վերջ տալու համար, ասել է ոստիկանության խուզարկու Խուան Սանտան: Կոմայից  դուրս գալուց հետո կինը չորս տարի է հիվանդանոցում էր, հայտնում է Reuters-ը:

Անդերսոնը նաեւ կնոջ սպանության մեջ է կասկածվում:

 «Պ-ն Անդերսոնը միակողմանի կարգով ճակատագրական որոշում է ընդունել՝ խլել երկու կյանք եւ մեկընդմիշտ փոխել իր եւ իր կնոջն ու քրոջը սիրողների կյանքը», - ասել է Լոս Անջելեսի  ոստիկանության լեյտենանտ Փոլ Վերնոնը: Նա նաեւ հավելել է, որ նման կարգի սպանությունների շարժառիթներն իրավաբանորեն երբեք չեն կարող արդարացվել:

Ըստ ոստիկանության՝ Անդերսոնը իր քույր Լիզային սպանել է Լոս Անջելեսի   վերականգնողական հիվանդանոցի պալատում եւ, ատրճանակը թողնելով սեղանին, սպասել ոստիկանության ժամանմանը: 

Մարդասպանն առանց դիմադրելու հանձնվել է, ասված է ոստիկանության հաղորդագրությունում:

Ավելի ուշ ոստիկանները նրա տանը հայտնաբերել են կնոջ դին:

Ըստ Անդերսոնի հարեւանների՝ իրենք գիշերը հրավառության ձայներ հիշեցնող աղմուկ են լսել, բայց ոստիկանություն չեն կանչել: Նրանց խոսքով՝ տղամարդը կյանքը կտար կնոջ համար, որը առողջական խնդիրներ ուներ: