Նախընտրելի
ՀՀԿ-ն աչքիս նժդեհականությունից հրաժարվել է եւ կրկին անցել մարքսիզմ-լենինիզմին: Այս մասին Facebook-ի իր էջում գրել է Հայաստանի նախկին վարչապետ, ՀԱԿ խմբակցության պատգամավոր Հրանտ Բագրատյանը:
Նա մասնավորապես գրել է.
«ԱԺ-ում բյուջեն քվեարկելիս Հայաստանի վարչապետն ասել է. ռեֆորմների շնորհիվ ՀԲ կողմից հաշվառվող գործարար միջավայրի ազատականության վերջին (2013-2014թթ) ինդեքսով (ease of doing business index) Հայաստանը հայտնվել է 37-րդ տեղում։ Այս մարդուն կարելի էր հիշեցնել, որ երբ 6 տարի առաջ վարչապետի պաշտոնը ստանձնեց, ստացել էր մի երկիր, որը գտնվում էր 34-րդ տեղում (2007թ)։ 6 տարում ՀՀ տնտեսությունը աճել 9.3%-ով (2008թ+6.9%, 2009թ՝ -14.1%, 2010թ՝ +2,1%, 2011թ՝ +4,7% , 2012թ՝ 7.1% եւ 2013թ՝4%)։ Տարեկան միջին աճը 1.5%, խոստացած 7%-ի փոխարեն։
Աշխարհի տնտեսությունն աճել է 11.8%-ով՝ տարեկան գրեթե 2%։ Արդյունքում հիմնական տնտեսական ցուցանիշներով 193 երկրների մեջ 2007թ 85-90-րդ տեղից իջել ենք 110-115-րդ տեղերը։
6 տարում Հայաստանը լքել է 380 հազար մարդ։ Հիմա ի՞նչպիսի ցինիզմ է պետք բարեփոխումների մասին խոսելու համար։ ՀՀԿ-ն աչքիս նժդեհականությունից հրաժարվել է եւ կրկին անցել մարքսիզմ-լենինիզմին. 6 տարի ռեֆորմ անելուց հետո նահանջել ենք ամենուր։ Ավելի հաջող ստելու համար կառավարությանը խորհուրդ կտայի կարդալ հանրահայտ «Մեկ քայլ առաջ երկու քայլ հետը»։
Լուսանկարը՝ Արսեն Սարգսյանի/NEWS.am
