Ամենամյա սոցհարցումների տվյալով՝ «ինչեւէ» (whatever) բառն արդեն հինգ տարի է՝ ամերիկացիներին ամենաշատն է նյարդայնացնում։ Հարցումն անցկացրել է Նյու Յորքի Հասարակական կարծիքի ինստիտուտը։

Պարզվել է՝  «Ինչեւէ» բառը նյարդայնացնում է  պատասխանողների 38%-ին,  հաջորդում է նման  (like) բառը՝ 22%, երրորդ տեղում է «դե, գիտես»-ը (you know)՝18%։

ԱՄՆ-ի բնակիչները նաեւ տանել չեն կարողանում «հենց այնպես եմ ասում» (just saying) արտահայտությունը եւ ակնհայտ է (obviously) բառը՝ համապատասխանաբար 14 եւ 6%։

Պատասխանողների 2%-ն այդպես էլ չեն կողմնորոշվել՝ որ բառն է իրենց նյարդայնացնում ամենաշատը։

 Ինստիտուտի ներկայացուցիչները նաեւ կազմել են քաղաքական գործիչների կիրառած ամենաձանձրացնող բառերի ցանկը։ Աներկբա առաջատարն է (41%) Obamacare բառը՝ Բարաք Օբամայի նախաձեռնած առողջապահական բարեփոխման ոչ պաշտոնական անվանումը։ 

Բացի այդ, ամերիկացիներին խիստ զայրացնում են «ֆիսկալ ճեղքվածք» (fiscal cliff) եւ «սեկվեստր» (sequestration) բառերը։

Սոցհարցման արդյունքները հրապարակվել են դեկտեմբերի  20-ին։