նախընտրելի դարձնել
Բեռլինի Մաքսիմ Գորկու անվան հանրահայտ թատրոնում օրերս Հայոց ցեղասպանության 100-րդ տարելիցին նվիրված «Այլեւս երբեք» խորագրով 40-օրյա միջոցառումների շարքի շրջանակներում ցուցադրվեցին հանրահայտ ռեժիսոր Սերժ Ավեդիքյանի «Շների կղզին» կարճամետրաժ անիմացիոն ֆիլմը եւ Մայքլ Հակոբյանի «Գերմանիան եւ գաղտնի ցեղասպանությունը» վավերագրական ֆիլմը։
ԱԳՆ մամուլի ծառայությունից հայտնում են, որ միջոցառմանը ներկա էին ՀՀ ԱԳՆ հատուկ հանձնարարություններով դեսպան, «Ոսկե ծիրան» կինոփառատոնի պատվավոր նախագահ Լեւոն Սարգսյանը, «Ոսկե ծիրան» կինոփառատոնի նախագահ Հարություն Խաչատրյանը, Գերմանիայում ՀՀ գործերի ժամանակավոր հավատարմատար Աշոտ Սմբատյանը, դեսպաններ, հասարակական-քաղաքական գործիչներ, դիվանագետներ, կինոքննադատներ, լրագրողներ, հայ համայնքի ներկայացուցիչներ։
Ֆիլմերի ցուցադրությունից հետո դեսպան Սարգսյանը հանդես եկավ Հայոց ցեղասպանությանը նվիրված դասախոսությամբ` ներկայացնելով Ցեղասպանության 100-րդ տարելիցի միջոցառումների էությունն ու բովանդակությունը: Այնուհետեւ դեսպան Սարգսյանը, Աշոտ Սմբատյանն ու Հարություն Խաչատրյանը պատասխանեցին ներկաների հարցերին։
