Սոչիի իշխանությունները չեղյալ են համարել գիշերային ժամանակ ծովում լողալու արգելքը: Այդ մասին հայտնել է քաղաք-հանգստավայրի վարչակազմի մամուլի ծառայությունը: 

«Սոչիի վարչակազմը, հաշվի առնելով նախ եւ առաջ քաղաքի բնակիչների շահերը, հրաժարվել է գիշերային ժամանակ լողափներ այցելության սահմանափակումներ մտցնելուց», — նշված է հաղորդագրության մեջ:

Սոչիի քաղաքապետ Անատոլի Պախոմովի խոսքով, իշխանությունների բոլոր գործողություններն ուղղված են հանգստավայրի հյուրերի եւ բնակիչների անվտանգության ապահովմանը, այդ թվում` լողափային տարածքներում: 

Նա գիտե նաեւ, որ Սոչիի շատ բնակիչներ հենց վաղ առավոտյան կամ երեկոյան` աշխատանքից հետո են լողափ այցելում:  

«Սակայն գիշերային լոգանքների սիրահարները պետք է իրենց հաշիվ տան, որ օրվա մութ ժամին  լողափներում բժիշկներ եւ փրկարարներ չկան, համապատասխանաբար` նրանք իրենք են պատասխանատվություն կրում իրենց անվտանգության համար եւ պետք է պահպանեն  օրենսդրության պահանջները: Լողափին սպիրտային  խմիչքներ խմելը,   անսթափ եւ դրա համար չնախատեսված վայրերում լողալն արգելված է: Նման պրակտիկա է գործում համաշխարհային շատ հանգստավայրերում»,- զգուշացրել են քաղաքապետարանից:

Ավելի վաղ հաղորդվել էր, որ Սոչիի քաղաքապետարանը լողափների աշխատանքի գրաֆիկ է սահմանել 08:00-ից մինչեւ 20:00-ն: