նախընտրելի դարձնելԱյս տարի Հայաստանն առաջին անգամ մասնակցել է Հռոմում անցկացվող Ֆրանկոֆոնիայի ֆիլմերի 8-րդ փառատոնին՝ ռեժիսոր Արամ Շահբազյանի «Մոսկվիչ, իմ սեր» գեղարվեստական ֆիլմով:
ԱԳՆ-ից NEWS.am-ին հայտնում են, որ ֆիլմի ցուցադրման հետ կապված կազմակերպչական աշխատանքներին իր աջակցությունն էր բերել Իտալիայում Հայաստանի դեսպանությունը՝ ՀՀ մշակույթի նախարարության հետ համագործակցությամբ:
Մարտի 16-ին Հռոմի «Ֆրանսիական ինստիտուտ-Սեն Լուիզ կենտրոնի» սրահում ունեցած միջոցառման ընթացքում ողջույնի խոսքով հանդես եկան Ինստիտուտի տնօրեն Օլիվիե Ժակոն եւ Իտալիայում Հայաստանի դեսպան Վիկտորիա Բաղդասարյանը:
Օլիվիե Ժակոն, ողջունելով ներկաներին, իր ուրախությունը հայտնեց փառատոնին առաջին անգամ Հայաստանի մասնակցության համար՝ մաղթելով շարունակականություն:
Դեսպան Բաղդասարյանն էլ իր հերթին բարձր գնահատեց Ֆրանկոֆոնիայի միջազգային կազմակերպության դերը միջմշակութային երկխոսության եւ համամարդկային արժեքների ամրապնդման գործում:
Հայաստանի դեսպանը ներկաներին տեղեկացրեց Ֆրանկոֆոնիայի միջազգային կազմակերպության 2018թ. գագաթաժողովը Հայաստանում անցկացնելու մասին:
Դեսպան Վիկտորիա Բաղդասարյանը նաեւ խոսեց Հայաստանից ներկայացված ֆիլմի մասին՝ այն բնութագրելով որպես մարդկային երազանքների ու իրականության, անցյալի ու ներկայի բախում:
