նախընտրելի դարձնելՀՀ արդարադատության նախարարության եւ ԱՄՆ միջազգային զարգացման գործակալության (USAID) միջեւ ապրիլի 21-ին ստորագրվել է համաձայնագիր՝ Հայաստանում դատական արխիվային նյութերի թվայնացման ֆինանսավորմանն աջակցելու նպատակով: Փաստաթուղթը ստորագրել են ՀՀ արդարադատության նախարար Արփինե Հովհաննիսյանը եւ ԱՄՆ ՄԶԳ երեւանյան գրասենյակի առաքելության տնօրեն Դեբորա Գրիզերը:
Նախարարությունից NEWS.am-ին հայտնում են, որ Արփինե Հովհաննիսյանը բարձր է գնահատել ԱՄՆ դեսպանատան եւ ԱՄՆ միջազգային զարգացման գործակալության հետ ներկայիս համագործակցությունը եւ հույս հայտնել, որ առկա փոխգործակցությունը ավելի կամրապնդվի եւ կկրի շարունակական բնույթ:
«Դատական արխիվների թվայնացումը կարեւոր գրավական է դատական համակարգի գործունեության եւ արդյունավետության բարձրացման համար: Համաձայնագրով նախատեսված աշխատանքների արդյունքում հնարավոր կլինի առցանց որոնել թվային ֆայլերը՝ այդպիսով կբարելավվի դատական գործերի եւ փաստաթղթերի վերաբերյալ տեղեկատվության հասանելիությունը եւ դատական համակարգի գործունեության թափանցիկությունը»,- ասել է նախարարը:
ԱՄՆ ՄԶԳ երեւանյան գրասենյակի առաքելության տնօրեն Դեբորա Գրիզերը եւս հատկանշական է համարել համաձայնագրի կնքումը եւ գոհունակությամբ նշել, որ Արդարադատության նախարարության հետ վերջին մեկ տարվա ընթացքում երկու կարեւոր համաձայնագրերի ստորագրումն արդեն իսկ վկայում են հարաբերությունների բարձր մակարդակի մասին:
Նշենք, որ փաստաթղթի շրջանակում հատկացվող միջոցները կուղղվեն դատական արխիվային նյութերի թվայնացմանը, առկա համակարգում դրանց ներմուծմանը եւ կարողությունների զարգացամանն ու հանրային իրազեկմանը:
