նախընտրելի դարձնել
Այն հանգամանքը, որ ԱԺ աշխատանքները բոյկոտելուց հետո «Ժառանգության» պատգամավորները գնացին ՀԱԿ հանրահավաքին, թույլ է տալիս մտածել, որ «Ժառանգության» հետագա անելիքները կախված են ՀԱԿ-ից: Այս մասին լրագրողների հետ հանդիպման ժամանակ մարտի 5-ին հայտարարեց ԱԺ ՀՀԿ խմբակցության պատգամավոր Լեռնիկ Ալեքսանյանը:
«Ժառանգությունը» փորձում է հարաբերություններ ստեղծել ՀԱԿ-ի հետ»,- նկատեց պատգամավորը: Իսկ թե ի՞նչ կորոշի «Ժառանգությունը» վաղը տեղի ունենալիք կուսակցության նիստում իր հետագա քայլերի առնչությամբ, Ալեքսանյանը դժվարացավ ենթադրություններ անել:
Նա նաեւ անդրադարձավ բացօթյա առեւտրով զբաղվողների, «Ժառանգության» պատգամավորների եւ ոստիկանների միջեւ նախօրեին տեղի ունեցած բախմանը, եւ նշեց, որ այն «շատ տգեղ եւ ցավալի դեպք էր», պատգամավորների դեմ ուղղված ոտնձգություն:
Պատգամավորը դատապարտեց ուժի կիրառումը ոստիկանների կողմից` նշելով, որ մեղավորները պետք է օրենքի ուժով պատժվեն: Նա միաժամանակ նշեց, թե գուցե ոստիկանները սխալ են վարվել, բայց, «բոլոր դեպքերում պատգամավորներն էլ են նպաստել այդ դեպքին»:
«Փոխադարձ ճիշտ հարաբերվելու դեպքում այդ դեպքը չէր լինի»,- հայտարարեց Ալեքսանյանը եւ նշեց, որ միջադեպի հետ կապված ընթացող ծառայողական քննությունը շատ հարցերի պատասխաններ կտա:
Հիշեցնենք, որ ԱԺ վերջին քառօրյայի ժամանակ «Ժառանգություն» խմբակցության անդամները լքեցին նիստերի դահլիճը եւ իրենց հետագա քայլերի վերաբերյալ որոշում են կայացնելու մարտի 6-ին կայանալիք կուսակցության խորհրդի ընդլայնված նիստում:
