նախընտրելի դարձնելՀայ հեղափոխական դաշնակցության եւ նրան միացած մի շարք կուսակցությունների կազմակերպած բողոքի երթի մասնակիցները կանգ առան Բաղրամյան պողոտայում՝ նախագահի նստավայրի մոտ, հայտարարություն տարածեցին, որում կոչ էին անում երկրի նախագահին չստորագրել հայ-թուրքական նախաստորագրված արձանագրությունների տակ:
Հավաքվածների մոտ դուրս եկավ նախագահի աշխատակազմի ղեկավար Կարեն Կարապետյանը, որին էլ հանձնվեց ուղերձը, որ մինչ այդ բարձրախոսով ընթերցել էր ՀՅԴ ներկայացուցիչ Արմեն Ռուստամյանը:
Ինչպես նշվում է ցուցարարների ընդունած ուղերձում՝ Հայաստանի արտաքին քաղաքական կուրսը շեղվել է Թուրքիայի հետ առանց նախապայմանների հարաբերությունների հաստատման կուրսից: «Նախաստորագրված արձանագրություններում կան դրույթներ, որոնք վտանգ են սպառնում ազգային անվտանգությանը: Վեցշաբաթյա հանրային քննարկումները ցույց տվեցին, որ ժողովրդի մեծամասնությունը հանդես է գալիս արձանագրությունների ստորագրման դեմ: Չնայած դրան, ստորագրման հակառակորդները, փոքր բացառություններով, չկարողացան իրենց դիրքորոշումը հեռուստաեթերով հանրությանը հասցնել: Մենք պահանջում են Ձեզանից՝ հրաժարվել հայ-թուրքական արձանագրոթյունների ստորագրումից: Հակառակ դեպքում Ձեզ վրա է ընկնում այդ քայլի բոլոր անկանխատեսելի հետեւանքների պատասխանատվությունը»,- ասված է երթի մասնակիցների հայտարարության մեջ:
Երթի հազարավոր մասնակիցները ներկայումս բարձրանում են Հայոց ցեղասպանության զոհերի՝ Ծիծեռնակաբերդում գտնվող հուշահամալիր, որտեղ էլ ժամը 19-ին պետք է սկսվի հանրահավաքը: Երթն ընթանում է առանց միջադեպերի, իրավապահ մարմինների աշխատակիցները իրենց բավական կոռեկտ են պահում: Ցուցարարները վանկարկում են «Ոչ թուրքական նախապայմաններին» եւ «Նախագահ, չզիջես»: Որեւէ հակակառավարական կարգախոս չի հնչում:
