Զինամթերքի հսկայական պակաս է նկատվում ոչ միայն Ուկրաինայում, այլև ամբողջ աշխարհում։ Բոլոր պաշարները սպառվել են, ուստի Ուկրաինան ձգտում է սեփական արտադրությունը կազմակերպել, հայտարարել է երկրի վարչապետ Դենիս Շմիգալը Financial Times-ին տված հարցազրույցում։

«Մենք ռազմամթերքի հսկայական պակաս ունենք ոչ միայն Ուկրաինայում, այլև ամբողջ աշխարհում»,- ասել է նա Financial Times-ին։ «Մենք հասկանում ենք, որ դրանք պետք է արտադրենք այստեղ՝ Ուկրաինայում, քանի որ ամբողջ աշխարհում դրանք վերջացել են, պաշարները սպառվել են։ Բոլոր պահեստները դատարկ են։ Այդ կապակցությամբ Ուկրաինան փորձում է սեփական արտադրությունը գործարկել՝ արևմտյան երկրներից կախվածությունը նվազեցնելու նպատակով»,- նշել է վարչապետը։

Այս պահին Կիևի առաջնահերթությունը երկրում ամերիկյան և եվրոպական պաշտպանական ընկերությունների հետ համատեղ արտադրություններ կազմակերպելն է։

Այսպիսով, Ukroboronprom կոնցեռնը համաձայնագիր է կնքել գերմանական Rheinmetall կոնցեռնի հետ, որը նախատեսում է վնասված Leopard տանկերի և այլ զրահատեխնիկայի վերանորոգում նոր զրահամեքենաների արտադրության հետ մեկտեղ։ Ըստ Շմիգալի՝ սա համագործակցության և համատեղ արտադրության 20 պայմանագրերից 1-ն է, որոնք ստորագրվել են արևմտյան պաշտպանական ընկերությունների հետ։

Միևնույն ժամանակ, որոշ արևմտյան երկրներ վախենում են նման համաձայնագրեր կնքել Կիևի հետ՝ Ուկրաինայում արտադրություն տեղակայելիս անվտանգության հնարավոր վտանգների պատճառով, նշում է Financial Times-ը։