Երկու խնդրի լուծումը կարող է կրկնապատկել և եռապատկել Հայաստանի ապրանքաշրջանառությունը Եվրասիական տնտեսական միության երկրների հետ։ Այս մասին հունիսի 25-ին կայացած քննարկման ժամանակ ասաց տնտեսագետ Հայկ Ֆարմանյանը։

Նա տնտեսության ավելի լավ զարգացման խոչընդոտներից անվանեց բանկային համակարգը, որը, ըստ նրա, գործարարներին անհեթեթ պահանջներ է ներկայացնում։

Փորձագետը որպես մեկ այլ խնդիր թվարկեց «Վերին Լարսի» անցակետով անցնելու անվերջ դժվարությունները։

«Հայաստանի կառավարությունն այս հարցում անգործության է մատնված, թեև պետք է ակտիվորեն բանակցի Վրաստանի հետ»,- նշեց Ֆարմանյանը։

Նա վստահություն հայտնեց, որ Հայաստանի անդամակցությունը ԵԱՏՄ-ին ակնհայտ առավելություններ է տվել
և դրանից դուրս գալը կնշանակի կտրել այն ճյուղը, որի վրա նա նստած է։

Փորձագետը նշեց, որ 2023 թվականին ապրանքաշրջանառությունն աճել է 47%-ով, իսկ արտահանման կառուցվածքն ակտիվորեն համալրվել է հեռախոսներով, համակարգչային տեխնիկայով, ավտոմեքենաներով։

Ֆարմանյանն այս հաջողություններն անվանեց վերաարտահանման արդյունքներ, ինչը Հայաստանի կառավարությունը փորձում է իրեն վերագրել։