նախընտրելի դարձնել
Սև ծովում նավագնացության ազատության համաձայնագիրը քաղաքացիական նավերի և նավահանգստային ենթակառուցվածքների պաշտպանության համար կարևոր ներդրում կունենա համաշխարհային պարենային անվտանգության և մատակարարման շղթաների մեջ, ըստ Reuters-ի՝ չորեքշաբթի հայտարարել է ՄԱԿ-ի խոսնակ Ստեֆան Դյուժարիկը։
Միացյալ Նահանգները երեքշաբթի հայտարարեց Ուկրաինայի և Ռուսաստանի հետ առանձին համաձայնագրերի մասին՝ դադարեցնելու իրենց հարվածները Սև ծովում և միմյանց էներգետիկ օբյեկտներին, սակայն Մոսկվայի և Կիևի հռետորաբանությունը հուշում է, որ նրանք առաջվա պես հեռու են միմյանցից:
Ըստ Դյուժարիկի՝ ՄԱԿ-ը հետևողականորեն աշխատում է այդ հարցի վրա, հատկապես, երբ ՄԱԿ-ի գլխավոր քարտուղար Անտոնիո Գուտերեշը անցյալ փետրվարին նամակ է ուղարկել Ուկրաինայի, Ռուսաստանի և Թուրքիայի առաջնորդներին՝ կոչ անելով «անվտանգ և ազատ նավարկություն իրականացնել Սև ծովում»:
ՄԱԿ-ը և Թուրքիան 2022 թվականի հուլիսին միջնորդել են Ռուսաստանի և Ուկրաինայի միջև Սևծովյան նախաձեռնությունը՝ ապահովելու համար ուկրաինական հացահատիկի անվտանգ արտահանումը:
Համաձայն կից եռամյա փոխըմբռնման հուշագրի՝ ՄԱԿ-ի պաշտոնյաները համաձայնել են օգնել Ռուսաստանին առաջ մղելու սննդամթերքի և պարարտանյութերի արտահանումը արտաքին շուկաներ:
Ռուսաստանը 2023 թվականի հուլիսին դուրս եկավ Սևծովյան նախաձեռնությունից՝ բողոքելով, որ իր սննդամթերքի և պարարտանյութերի արտահանումը լուրջ խոչընդոտների է բախվում։ ՄԱԿ-ի առևտրի գլխավոր ներկայացուցիչ Ռեբեկա Գրինսպենը շարունակում է աշխատել Ռուսաստանի հետ՝ փոխըմբռնման հուշագրի իրականացման ուղղությամբ և վերջին անգամ երկուշաբթի Մոսկվայում հանդիպել է ռուս պաշտոնյաների հետ:
«Միավորված ազգերի կազմակերպությունը նույնպես շարունակում է ակտիվորեն ներգրավված լինել փոխըմբռնման հուշագրի շարունակական իրականացման գործում», - հայտարարել է Դյուժարիկը։ «Գլխավոր քարտուղարի բարի ծառայությունները մնում են հասանելի՝ խաղաղության հասնելու բոլոր ջանքերին աջակցելու համար»:
