նախընտրելի դարձնել
Հոկտեմբերի 11-ի երեկոյան, տեղի ժամանակով ժամը մոտ 17:00-ին, Մադագասկարի CAPSAT ցամաքային ուժերի զինված ստորաբաժանումները մտել են երկրի մայրաքաղաք Անտանանարիվու։
Jeune Afrique-ի տեղեկացմամբ՝ զինվորների եւ կառավարական ուժերի միջեւ կարճատեւ փոխհրաձգություն է սկսվել, սակայն դիմադրությունը նվազագույն է եղել։
Զինվորականները գրավել են Մայիսի 13-ի հրապարակը՝ խորհրդանշական վայր, որտեղ 1970-ականներից ի վեր սկսվել եւ ավարտվել են Մադագասկարի բազմաթիվ ռեժիմներ։ Ցնծացող բնակիչների բազմությունը խռովարարներին անվանել է ազատագրողներ։
Որոշ աղբյուրներ հայտնել են, որ նախագահ Անրի Ռաջոելինան լքել է մայրաքաղաքը, սակայն դեռեւս պաշտոնական հաստատում չի եղել։
Նույն առավոտյան CAPSAT-ը հայտարարություն է հրապարակել Facebook-ում՝ կոչ անելով բանակին եւ ոստիկանությանը «հրաժարվել կրակելու հրամաններ տալուց» եւ «ստանձնել ժողովրդի պաշտպանության պատասխանատվությունը»։ Հայտարարության մեջ զինվորականները բողոքել են, որ դարձել են «իշխանությունների կամակատարներ»՝ կատարելով անօրինական հրամաններ քաղաքացիական բնակչությանը պաշտպանելու փոխարեն։ Նրանք հիշել են սեպտեմբերի 25-26-ի իրադարձությունները, երբ ուսանողական եւ ակտիվիստական բողոքի ցույցերը բռնի կերպով ցրվեցին. ՄԱԿ տվյալներով՝ զոհվել է առնվազն 22 մարդ։
Սկզբում Madagascar Gen Z շարժման մասնակիցները պահանջում էին ջրի, էլեկտրաէներգիայի եւ առողջապահության հասանելիության բարելավում, ինչպես նաեւ կոռուպցիայի վերացում: Սակայն փողոցային բռնություններից հետո բողոքի ցույցերը վերածվեցին քաղաքական բողոքի ցույցերի, որոնց ժամանակ ցուցարարները պահանջում էին 51-ամյա նախագահ Ռաջոելինայի հրաժարականը, որը իշխանության եկավ 2009թ․ նմանատիպ փողոցային անկարգություններից հետո եւ վերընտրվեց 2019 եւ 2023թթ.:
Չնայած հեղաշրջման փորձի մեղադրանքներին՝ Ռաջոելինան պնդում էր, որ լսում է «երիտասարդության ձայնը» եւ հոկտեմբերի 6-ին լուծարեց կառավարությունը՝ գեներալ Ռյուֆեն Ֆորտյուն Դիմբիսուա Զաֆիսամբոյին նշանակելով նոր վարչապետ: Սակայն այս քայլը չկարողացավ կանգնեցնել անկարգությունները. հոկտեմբերի 9-ին հազարավոր ցուցարարներ կրկին դուրս եկան Անտանանարիվուի փողոցներ:
Հոկտեմբերի 10-ին ՄԱԿ մարդու իրավունքների գերագույն հանձնակատար Վոլքեր Թուրքը կոչ արեց իշխանություններին «դադարեցնել չափազանց ուժի կիրառումը»՝ նշելով, որ զոհերի թիվը կրկին աճում է:
Մադագասկարում իրավիճակը մնում է խիստ լարված, իսկ զինվորականների եւ կառավարության միջեւ դիմակայության ելքը դեռեւս անկանխատեսելի է:
